No.7925/2020-2021

Aizawl, 25th March, 2021: Vawiin khan Aizawl Adventist Hospital chuan an din champhaphak vawi 25-na (silver jubilee) chu an hospital tual zawlah Health Minister Dr R.Lalthangliana hovin an lawm.

Dr.R.Lalthangliana chuan Aizawl Adventist Hospital kum 25 tlin champha phak lawmpuina thu sawiin Aizawl khawpui, a bik takin tlak lam vengah hospital ding hmasa ber leh rei tak chhunga damdawi in awm chhun a nih avangin an hlu hle, a ti a. He hospital hi hospital dangin an tih theih loh ti theitu leh bul tantu an ni, a ti. Hrisel turin nun fimkhur dan inzirtir a tul a, mahni inthunun theih leh kawng engkima insum theih a pawimawh, Minister chuan a ti a, hemi kawngah hian Adventist Hospital hian an thawhhlawk hle, a ti bawk.

Health Minister chuan ram changkang leh hausa te pawh tlawm zeltu COVID-19 vanga hun khirh leh rapthlak tak khawvelin a hmachhawn mek laiin Mizoram chu Pathianin a humhim a; sawrkar hmalakna piahlamah kohhran, tlawmngai pawl leh mipui mimir te inpekna avangin COVID-19 avanga nunna chan kan tlem hle, a ti a. Pathianin thawkrim te mal a sawm thin a, he hripui dona kawnga theihtawp chhuahtute thawhrimna chu Pathianin mal a sawm a ni, Dr R.Lalthangliana chuan a ti.

Kum 1996-a din Aizawl Adventist Hospital hi India hmarchhaka Adventist Hospital ding hmasa ber a ni a. Khum 10 neiin thawktu tlemte nen bul tan a ni a, tunah chuan khum 50 awmin thawktu 80 an nei mek a ni. Nu leh naupang enkawlna (maternal and child care) bakah zu leh ruihhlo ngawlvei enkawl (de-addiction & lifestyle service) te, dental care lamah te thiamna bik an nei a ni.

Vawiin programme-ah hian Hospital Director Dr Eileen Lalrinpuii chuan Adventist Hospital din tan dan leh hnathawh dan kalphung a sawi a. Adventist Hospital Aizawl din tirha Director hmasa ber Dr.Narendra Rao chu khual zahawm niin thusawina hun a hmang bawk. Silver Jubilee lawmna programme hi nilenga neih a ni.