No.7924/2020-2021

Aizawl, 25th March, 2021: Urbanization and its Impact on Environment tih thupui hmangin vawiin atanga tanin Aizawl North College-ah National Seminar neih a ni a. Higher and Technical Education Minister Dr R.Lalthangliana chu khuallian niin Seminar hi a hawng a ni.

Dr R.Lalthangliana chuan khawpui bawha mipui pemkhawm leh chumiin a hrinchhuah environment-a nghawng tha lo tak lo awm ta chu Mizoram chauh ni lo khawvelin a buaipui a ni, a ti. Mipui mamawh phuhru turin ram ngaw kan thiat a, chu chuan khawlum leh khawkheng a hring a, kan lui te a kang chat a, lui lian te pawh a kam telh telh a ni, Minister chuan a ti a. Tun dinhmunah Mizorama mipui awm zat atanga chhutin hmun li (4) a thena hmun khat (1) chu Aizawl khawpuia cheng kan lo ni ta a, hei hian sik leh sa chauh ni lovin hmunhma indaihlohna a siam a, khawtlang nun thlengin a tha lo zawngin nghawng a nei a ni, a ti. Nungcha humhalh te, ram tih kan loh te, thingphun uar te kan chin chhoh zel a ngai tih sawiin Higher & Technical Education Minister chuan khawpui chauh bawh lova thingtlang khua, thil thar tam tak bul tan theihna hmunah kan kir leh a ngai a ni, a ti.

Higher and Technical Education Director Pi Nazuk Kumar pawhin thu sawiin khawpuia mihring pun zel avanga harsatna thleng hi India ramin a buaipui nasa hle a, tun dinhmunah mi zaa 34 vel chu khawpuiah kan cheng mek a ni, a ti a. Khawsak awlsam zawk beisei avanga khawpuia mihring pemkhawm zel hi dan theih a nih loh avang leh Mizoram pawhin a tawn chhoh mek leh tawn zel tur a nih avangin nghawng tha lo a neihte hriaa, kan inzirtir tam a ngai a ni, a ti.

Vawiin programme hi Organising Committee Chairman Dr H.Laldinmawia’n a kaihhruai a. Prof S.Haukhanlian Mate, Principal Aizawl North College chuan kalkhawm te lawmna thu sawiin Dr Lalrinmawia, Coordinator chuan report a pe a. Pi C.Nunsiamliani’n lawmthu sawiin hun hnung a khar a ni.