No.7923/2020-2021

Lunglei, March 25, 2021: Vawiin khan Persons with Disabilities (PwD) Commissioner Pi Vanlaldiki Sailo hovin Lunglei DC Conference Hall-ah Lunglei District Head of Office te an thu khawm.Meeting hi Lunglei DC Pu Kulothungan A in kaihruaiin Lunglei SP Pu Rex Zarzoliana Vanchhawng pawh a tel a ni.

Persons with Disabilities (PwD) Commissioner Pi Vanlaldiki Sailo chuan rualbanlo kan tihte hi sawrkar chuan a ngai pawimawh chho zel a, an tan ruahmanna leh hamthatna tam tak siamin, sawrkar hna lak chungchangah pawh rualbanlote tan hian 4% zet a dah hrang hial tawh a, sikul leh college admission tihnaah pawh 5% hial a dah tawh bawk a ni, a ti a. Rualbanlote tan India sawrkar laipui Ministry of Social Justice and Empowerment kaltlangin Accessible India Campaign kum 2015 atanga kalpui a nih thu sawiin Mizoramah pawh hei hi tha taka kan zawm a tul a, sawrkar building pawimawhah te ramp dah a, inthiarna te pawh rualbanlote hman theih tura kan siam a tul a ni, a ti. 

Vawiin thutkhawmah hian rualbanlote tana Samagra Shiksha, Lunglei District, Social Welfare Department, H&FW leh Food & Civil Supplies Department-te hmalakna te ngaihthlak niin, hmalak tulna leh kal zel dan turte sawi ho nghal a ni a. Persons with Disabilities (PwD) Commissioner chuan tun dinhmunah Lunglei District-ah rualbanlo zirlai school-a inenrol mi 760 an awm thu report-in, data kim chang zawk neih nan school-a hming ziaklut lo leh puitling data lo la khawm turin Social Welfare Department, Lunglei District mawhphurna a pe nghal a ni. Rualbanlote zirtir tura ruat Special Needs Teacher Mizoramah mi 132 an awm thu pawh report-in Lunglei District-a heng teacher te hian an thawh tur an thawk ngei em tih lo enpui a, hmalak pui turin meeting Chairman leh  Samagra Shiksha, Lunglei District hotute mawhphurna a pe bawk a ni.

Persons with Disabilities (PwD) Commissioner Pi Vanlaldiki Sailo hian vawiin vek khan MHIP leh Onyx Society te enkawl Special School, Chanmari a tlawh nghal bawk a ni.