No.7922/2020-2021

Aizawl, 25th March, 2021: Aizawl East-II bialtu MLA leh Sports minister ni bawk, Pu Robert Romawia Royte chuan tukin zing khan a bial chhung Armed Veng a tlawh a.  Amah lo dawngsawngtu khawtlang hruaitute hmaah thu sawiin "Aizawl East-II bial mipuiten an aiawh tura thlan tlin ka nih angin tumah thlei bik nei lovin mitin huap zova hma lak zel ka tum a ni," tiin a sawi a. Zoram pum huapa mawhphurhna nei Minister of state a nih ang pawhin huapzo taka hmalak zel a tum tih a sawi.

 Armed Veng mipuite aiawha amah lo dawngsawngtu, khawtlang hruaitute hma ah Pu Robert Romawia chuan Armed Veng chhunga Sorkar hmalakna hrang hrangte tarlangin thu a sawi a. 1st MAP football ground-a field chhawng sak leh phullem phah mek chak taka kalpui a ni chu lawmawm a ti a. YMA road siam mek pawh chhunzawm zel a nih theihnan sum pek belh a tum thu sawiin Armed Veng hmasawnna atana pawimawh em em, Vengchung leh Venghnuai Inkalpawhna Kawrchung Kawngpui siam turin UD&PA-in Tender an ti fel tawh a, cheng nuai 150  hmangin he hna hi thawh tur a nih thu a sawi bawk.

Pu Lalzuiliana Local Council Chairman chuan Armed Veng hmasawnna atana a hmalaknate avangin khawtlang aiawhin Minister chungah lawmthu a sawi a. An veng chhunga sawrkar hmalakna te tha takin an lo tawiawm zel dawn tih a sawi a. Armed Veng khawtlang mamawh hrang hrangte chu ziakin Bialtu Minister hnenah hian a theh lut a ni.