No.7921/2020-2021

Aizawl, 25th March, 2021 : Hmar tlangdung fanga zin mek School Education Minister Pu Lalchhandama Ralte chuan Zirna siamthat hna thawh mekah sorkar School thenkhatah chuan sikula naupang inziak lut an pung ta, tiin vawiina N.Khawdungsei leh Sakawrdai khuate a tlawhnaah a sawi.

Vawiin khan Sakawrdai Teachers Association-te chuan Pu Lalchhandama’n an khuaa zirna siamthat hna a thawhah hmasawnna nasa tak hmuh tur a awm avang leh zirtirtu lama indaih lohna avanga harsatna an neih pawh sutkian a nih tak avangin Minister hnena lawmthu sawina inkhawm hi an buatsaih a.

Minister chuan hmar tlangdung khua leh thingtlang hmun dangah pawh zirna a tlahniam nasa hle a, zirtirtu pahnih khat lek lek awmna a tam a, school building pawh naupang tan zirna boruak awm theih lohna khawpa tlabalte a tam a. Hengah te hian a theih ang angin zirtirtu dah belh a ni a, school building pawh engemaw zat sak that  a nih bakah repair hna pawh hmun tam takah thawh a ni a ti bawk. Hetianga sorkarin a theih ang anga zirna siamthat hna a thawh avang hian khaw thenkhatah chuan kum hmasa nena khaikhinin enrolment a lo pung ta a, sikul thenkhatah chuan thutna an indaih lova, classroom sak belh ngaite pawh a awm ta hial a, hei hi thil lawmawm tak a ni tih sawiin sorkar sikulte zawi zawiin a belhtlak zel ang tih a beisei thu a tarlang a ni.

Minister hian Tuivawl bial khaw hrang hrang a fan kualnaah hian khaw thenkhat panna kawng chu PMGSY atanga siamthat tum a nih thu te, Covid-19 hrileng avanga kutthlak mai theih loh a nih thu leh theihtawpa hmalak zel a nih thu a sawi bawk. Khaw thenkhatin tui lama harsatna an tawh pawh a theih ang angin JJM leh fund dang atanga sutkian tum a ni, tiin a sawi.

Minister chuan Khawdungsei leh Sakawrdaiah te hian khaw chhunga sorkar office leh zirna hmun pawimawh te, Police station-te a tlawh a.  Pu Lalhmachhuana State Project Director Samagra Shiksha te, Pu Lalfakawma Sakawrdai SDO (Civil) te, officer thenkhatte leh Sinlung Hills Council-a Chairman, EM leh member thenkhatte’n an tawiawm a.  Khawtlang hruaitute, sorkar hnathawk leh tlawmngai pawl hruaitute’n an lo dawngsawng a ni.