No.7920/2020-2021
Aizawl the 25th March 2020: Vawiin khan District Research Officer’s Office cum Office of the Assistant District Registrar’s Office, Khawzawl District chu Dr. Vanlaltanpuia, MLA leh Chairman, Mizoram Youth Commission ni bawk chuan a hawng a. He hun hi Zaingen YMA Hall, Khawzawlah neih a ni.
Dr. Vanlaltanpuia, MLA chuan Statistics Office, Khawzawla an hawng thei chu lawmawm a tih thu a sawi a. Development hna reng reng hlawhtling tur chuan research-based a ngai a, chutiang hnathawk tur leh pian atanga thih thleng documents pawimawh siam leh buaipui thei tura District Economics & Statistics Office hawn a ni ta chu lawmawm a tih thu a sawi. Sorkar-in SEDP a ngaihpawimawh thu leh human resource development, social security, healthcare, insurance leh infrastructure tihchangtlun kawngah sorkar chuan hma a lak chhoh zel thu a sawi a. State sum lakluh tih pun nana thil tul te zirchianna nei turin Economics & Statistics Department chu a beisei thu a sawi bawk a ni.
District hawnna hun hi Dr. Lalrinchhana, Director, Economics & Statistics chuan a kaihruai a. He hunah hian Pu Zothanmawia, Khawzawl District Bawrhsap pawhin thusawina hun a hmang a. Pu B. Lalrinhlua, Joint Director chuan lawmthu sawiin hun a khar thung a ni.
