No.6920/2020-2021
Tukin zing kar khan MIZOFED Petrol Pump, Treasury Square-ah Co-Operation Minister Pu C.Lalrinsanga chuan MIZOFED in a bik taka Two Wheeler tana siam Petrol Thunna (Petrol Dispensing Unit) chu a hawng.
Hawnna inkhawm tawi buatsaihah Co-Operation Minister Pu C.Lalrinsanga chuan Two Wheeler tan bika Petrol pump MIZOFED in a bun ta chu hmasawnna bung thar chi khat a ni, a ti a. Tuialhthei thianghlimloin lirthei a tihchhiat nasat theih zia hriain MIZOFED hi an fimkhur hle a. Oil an pek chhuah te hi a thianghlim tawk tura ngaih a ni, a ti a. Oil (POL) lama kan hnianghnar zawk theih nan sawrkarin Bairabi-ah Oil Depot changtlung zawk buatsaih a tum mek a ni, tih a sawi a. Chhun zana petrol pump a thawk tute chu hah hle mahse an hnathawh chu mipui rawngbawlna a nih avanga phur taka thawk chhunzawm zel turin a fuih bawk a ni.
He Two Wheeler Petrol Pump thar hawnna hi MIZOFED Chairman Pu K.Laldawngliana'n a kaihruai a. MIZOFED Managing Director Pu Rinzuala sawi dan chuan he petrol pump thar hi IOC in a rawn bun sak a ni a. MIZOFED hian nitin petrol Truck trip 18 vel an semchhuah thin thu te, hei aia tam zawk sem chhuak tura hmalak mek a nih thu te a sawi bawk a ni.
