Vawiin khan Co-operation department enkawltu Minister Pu C. Lalrinsanga’n Mizoram Cooperative Apex Bank (MCAB) Branch 20-na, Thuampui Branch, AMC Building Ground Floor a awm chu a hawng a, Branch a hawn rualin Minister hian he building-a MCAB Bank in ATM an dah thar pawh a hawng nghal a ni.

Co-operation Minister  Pu C. Lalrinsanga chuan kum 15 kalta a MCAB dinhmun ngaituahin tuna an dinhmun chu a tha tawh hle a ni a ti a, an than dan chu lungawi thlakin tunhnai a District thar khawpui – Khawzawl leh Hnahthial ah te Branch an hawng leh Saitual bul Keifang ah pawh Branch an hawn tum leh chu lawmawm a tih thu a sawi bawk. Co-operative Movement hmangin ram leh hnam chawikan a, an dinhmun siamthat a nih theih dan te sawiin Co-operative Society te kaldan erawh enchian a, State level society te hian an enpui leh an kaihruai a tul tiin a sawi lang bawk.

Pu C. Lalrinsanga chuan Bank atanga sum puk rul tha lo leh Non-Performing Assets chungchang sawilangin hengte hi Bank tan chuan ngaihven reng a tul a, heti chungin tunah chuan mipui tam zawk rilru ah Bank sum puk hi rulh that a ngai tih hi a in tuh tawh a, hei hi lawmawm hle in ka hria a ni, a ti. MCAB chu credit society anih angin cooperative movement than zelna atan leh society te hmasawnna atan ding a ni a, mahse fimkhur takin kal a tul a, society te hmasawnna leh than zelna in MCAB chu a than belh tir thei a ni tih hi hriat thar a ngai a ti. Kut hnathawktute hmasawnna leh bank than zelna in inzawmna an neih dan te sawiin lonei mite kutah sum che vel a awm chuan bank a sum che vel a awm tihna a ni a, chu chuan economy thanna a thlen zel thei a ni, a ti.

He hunah hian Aizawl Munical Corporation Mayor Pu P.C. Lalhmingthanga pawhin thu sawiin MCAB chu helai mipui leh AMC ngei pawhin an tangkaipui hle a beisei tih a sawi.

Branch thar hawnna inkhawm hi MCAB Chairman Pi T. Lalmuanpuii’n kaihruaiin Pu Lalzuahliana’n lawmthu sawiin programme a khar a ni.

Mizoram Cooperative Apex Bank hi 1982 khan cheng nuai 82 in bul tan lo niin tunah an sum che vel ‘transaction’ chuan vaibelchhe 1151 vel a hawlh tawh a. Branch 20 neiin hnathawktu a nghat leh MR mi 200 bawr vel an awm a. MACB ah hian Sawrkarin za zelah 23 bawr vel chan neiin a bak chu shareholder leh society ta chan a ni a. Thingtlanga a Primary Agricultural Credit Society 31 enkawl an nei mek bawk a ni.