1009/2025-2026:

Aizawl |Vawkhniahzawn thla ni 1, 2025: Vawiin khan Office of the Registrar, Cooperative Society chuan, UN kumpuan - International Year of Cooperatives 2025 hnuaia an hmalakna peng pawimawh tak pakhat, Ek Ped Maa Ke Naam (nu hminga thing phunna) hun chu, Mizoram Milk Producers’ Cooperative Union (MULCO) Complex, Thuampui, Aizawl-ah an hmang a; inkhawm tawi buatsaih niin Pu John LT Sanga, Registrar, Co-operative Societies chuan a kaihruai a, Pu P.C. Vanlalruata, Co-operation Minister chuan khuallian niin a hmanpui.

Khuallian Pu P.C. Vanlalruata chuan thing phun pawimawhzia sawiin hemi tihlawhtling tura Co-operation Department te, Co-operative Society leh Federation-te hmalakna chu fakawm a tih thu a sawi a. Khawvel nuam zawk leh boruak tha zawk siam chu Co-operative thil tum pawimawh tak a nih thu sawiin UNO pawhin a ngai pawimawh hle a, kum 2025 pawh International Year of Cooperatives tia a puan hial thu a sawi. Mizoramah pawh Co-operative Movement tih hmasawn nan tan lak tlan a pawimawh thu sawiin, he International Year of Cooperatives pual hian thing phun mai ni lo, thisen pek runpui emaw, eizawnna miten an neih theihna tur thil emaw, thalai tam zawkte cho chhuak tur thil tha dang eng emaw ti chhuak zel tura ngaihtuahna seng zel turin Co-operative hruaitute chu a fuih bawk.

Pu John L.T. Sanga, MCS, Registrar of Co-operative Societies hnen atangin International Year of Cooperatives 2025 puala Mizorama hmalakna hrang hrangte ngaihthlak niin, Ek Ped Maa Ke Naam programme kalpui a nih dan leh thing leh mihring ten inkungkaihna thuk tak an neih dante a sawi bawk. 

Vawiin hun hmannaah hian Pu H. Dolianbuaia, Joint Secretray, Co-operation Department leh sawrkar mi pawimawh dang ten khuallian hi an tawiawm a, Co-operative Society leh Federation hrang hranga Chairman leh member thahnem tak an tel bawk. Pu C. Lalrammawia, Chairman, MULCO chuan lawmthu sawiin inkhawm hi a khar a, hemi hnu hian Minister hovin thing phun zui nghal a ni.

International Year of Cooperatives 2025 puala hmalakna thenkhatte:

•    8 April 2025 – Minister-in IYC 2025 Monument khuhhawnna leh IYC T-Shirt release-na RCS Office Babutlang-ah a nei.

•    5 May 2025 – Cooperative Awareness atan Vanapa Hall atanga Millenium Centre thleng kawng zawh hona (Walkathon) neih a ni.

•    District visit programme - Saitual, Mamit, Champhai, Lunglei te, Secretary, Co-operative Department leh Registrar of Cooperative Societies ten an tlawh.

•    Ek Ped Maa Ke Naam hi District hrang hrang-ah kalpui tawh niin District Co-operative Officers-te pawhin thing phunna hun an hmang tawh bawk.