1010/2025-2026

Saitual, 1st July, 2025: Vawiin khan Minister of State Pu F. Rodingliana, Lengteng bialtu MLA ni bawk chuan tunhnaia leiminin a tihchhiat Ngopa Community Health Centre (CHC) chu tlawhin, leiminin a tihchhiat belh zel tur venna tur leh OPD building luah ngamloh sawn lai lawk dan turte a enpui a ni.

Pu F. Rodingliana hian Ngopaah hian Saitual District Bawrhsap Dr. Lalngura Tlau leh Dr. R. Lalnienga, Champhai Chief Medical Officer te nen khawtlang hruaitute an kawm a, ruahmanna hrang hrangte an sawiho nghal a ni. He thutkhawmah hian Ngopa CHC Medical Officer Dr. Lalrintluangi chuan leimin avanga harsatna an tawh chhoh dan report pein, leimin avang hian OPD Building leh choka te luah ngam lohin a awm tawh thu a sawi a, damlo en pawh casualty wardah neih rih a nih thu a sawi bawk a ni.

Minister Pu F. Rodingliana hian geologist ten lei chet dan te an zir chian nghal tur thu leh a siam that dan tur pawh NHIDCL te leh PWD bakah NHM Technical Wing lama mithiamten ruahmanna an siam thuai dawn tih a sawi a. Minister hian leimin avanga harsatna a thlen hma daih atang tawh a Ngopa CHC building chu sak that tura ruahman tawh a ni tih sawiin, sakthatna tur pawisa pawh a awm tawh thu a tarlang bawk a ni. Minister chuan hun lo kalleh zel tur thlir chunga khum 50 tal awm tura tihlen a tul thu sawiin, a tul chuan damdawi in awmna pawh sawn mai turin hma thlir thui tak nei turin khawtlang hruaitute leh official kalkhawmte chu a chah a ni. 

Vawiin thutkhawmah hian Dr. Lalngura Tlau, Saitual Bawrhsap bakah Dr R. Lalniliana, CMO te pawhin thu an sawi a, NHIDCL lamin an kawng laih  avanga damdawi in ram min chungchanga an hmalakna leh ruahmanna an siamte an tarlang bawk.  He hun hman zawhah Pu F. Rodingliana hian Ngopa Playground chei that mek chu a hmunah en nghalin, hnathawh mekte a tlawh kual a, hnathawh chinah a lungawi thlak a tih thu sawiin hnathawktu contractor te chu tha taka hna thawk zel turin a chah a ni. 'Upgradation of Sport Infrastructure of Ngopa Playground' hi North Eastern Council(NEC) funding niin hnathawh hun chhung bituk aia hmain kumin October ah hian zawhfel an in beisei thu hnathawktuten Minister hi an lo hrilh a ni. 

Minister hi Dr Lalngura Tlau, Deputy Commissioner, Saitual District, Pu R Lalnienga, Chief Medical Officer, Champhai, Pi Lalenkawli, AE, NHM(Technical Wing), Er. H. Vanlalhlima, SE(Transmission), Power & Electricity Deptt, Pi Dorothy Muansangi, SDO(C), Ngopa, Er. Laltanpuia, EE(C),Er. Ng. Lalruatsanga, EE, Khawzawl Power Division, Pu Zoremsanga, Geologist, Directorate of Geology & Mining ten an tawiawm a ni.