Integrated Co-operative Development Project (ICDP) chungchangah vawiin khan Assistant Registrar, Co-operative Societies Champhai buatsaihin Champgai I&PR Auditorium-ah Awareness Campaign neih a ni.

Pu Zaliankhuma, Project Officer, ICDP, Champhai District kaihhruaiah hian Pu C.Vanlalhruaia, JICS chuan ICDP scheme hnuaia fund kal dan a sawifiah a. Integrated Cooperative Development Project, Central Scheme pakhat a nih thu leh, sum 20% hi Ministry of Agriculture & Cooperation, Govt. of India atangin subsidy a lo kal anih thu leh, 80% hi National Cooperative Development Corporation atangin Loan angin a lo kal thu a sawi a. He loan hi State sorkarin 30% a lo dolet ve thung a, 30% hi share capital-in a kal a ni. 2nd phase-ah Mizoramin cheng vaibelchhe 44 a dawng a. Mizoram District 6-ah ICDP hi hman niin, Champhai District-ah cheng nuai 590 pek a ni a, hei hi Society 90 ten an dawng dawn a ni, a ti a. Tunah hian nuai 123 sing 7 leh sang 5 chu Champhai tan release tawh a ni a, kar hmasa zirtawpni khan sum hi society-ah sem tan nghal a ni a, vawiinah cheng nuai 11 sem leh a nih bakah, naktukah cheng nuai 28; nilaini-ah cheng nuai 34 leh February thlaah a bak zawm sem chhunzawm a ni tur thu a tarlang tel bawk.

Pu K.Lalduhawma, Development Officer, ICDP pawhin zirtirna pein, he scheme-in a tum ber chu Cooperative Society te bultanna leh tihhmasawn a nih thu a tarlang a. Cooperative Society tihhmasawnna turin kum 4 chhung atan he scheme hi kalpui a nih tur thu a tarlang.

ICDP scheme  vilzui tur hian District Level Coordination Committee din a ni a. DC chu Chairman niin, Assistant Registrar, Cooperative Society chu Member Secretary a ni a. Member-ah hian  a kaihhnawih Department tinte an awm bawk. Kum hnih hnuah DLCC hian fund la hman loh 10% chu a tha a tih angin a hmang thei dawn a ni tih te a tarlang ve bawk.

Vawiin Awareness Campaign ah hian Pu Rothangliana Bawitlung, JICS chuan Society hruaitu kalkhawmte chu sum vawn fel pawimawhna chungchangah zirtirna a pe ve bawk. Integrated Co-operative Development Project-ah hian 1st phase-ah PIA chu Mizoram Co-operative Apex Bank an ni a, 2nd phase PIA ah Co-operation Department an ni ve tawh thung a ni.