Nimin a Co-Ordination Committee on Traffic Management an Chairman Pu PC. Zoram Sangliana ho a, a Office Chamber a thukhawm chuan khawpui chhung Traffic Jam nasa lutuk tih kian nan kawng hrang hrang a hmalak dan tur hetiang hian an rel.
Aizawl Passenger Carrier Vehicle Joint Action Committee ten an duh dan Sorkar a an thlen angin June ni 18,2012 atang chuan tuna an in tlan chhawk thin chu sutin an vaiin an tlan tawh dawn a ni.
Khawpui chhung kawngpui sir a Workshop, Thing leh Mau zawrhna, Cement leh Brick leh Iron Rod zawrhna zawng zawng chu khawpui pawn a sawn tir vek tur an ti a. An lo in buatsaih lawk theih nan thla thum (3)chhung hun pek nise an ti.
New Market chhunga Bawlhhlawh paih Motor luh rual a Motor dang tlan lut ve thin chungchang pawh an sawi ho a, Traffic Police ten lo enfel se an ti bawk.
High Security Registration Plate chungchang pawh sawiin hei hi India rama Lirthei bo tam lutuk ven nana mipui hmakhaw ngai a Supreme Court thu pek zawk a ni a; mitin te zawm theuh tur a beisei an ni.
Life Time Tax chungchang pawh an sawi hova hei pawh hi National Transport Development Council in mipuite hmakhaw ngai a a hniam thei ang ber a 6% a a bi thliah a ni a. Hriat chian chuan a Tax petute tan a man hla zawk fe a ni an ti.
He meeting ah hian Member te an kal tha hle a ni.
