Vawiin chawhma dar 10:30 khan ni 2 chhung awh tur State Level Seminar on Socio-Economic Transformation of Mizo Society tih University Grant Commission in an buatsaih chu I&PR Conference Hall, Saiha-ah neih a ni.
He seminar hawnna inkhawm hi Dr. Chawngkhuma Chawngthu, Co-Ordinator, Internal Quality Assurance Cell (IQAC) NAAC, Govt. Saiha College, Saiha chuan a kaihruai a, Pu C. Zohupa, Principal, Govt. Saiha College chuan kalkhawmte lawmna thu sawiin Prof. Lalthantluanga, Vice Chancellor, Mizoram University chu khuallian niin a hmanpui.
Khuallian Prof. Lalthantluanga chuan hetiang seminar neih hi hmun kilkhawr a buatsaih a harsat hle laia Saiha-a buatsaih a ni thei chu lawmawm a tih thu a sawi a, Vice Chancellor a nih hnuah duh anga College hrang hrang te a tlawh tam theih loh thu sawiin IQAC ten zirna tih hmasawn leh tih changtlung nana mawhphurhna nasa tak an neih thu leh Mizote nunphung ah hun nasa taka a inthlak thu te ei leh bar thila intodelh a pawimawhzia thu pawh tarlangin Agriculture ah pawh nasa takin hma kan sawm tawh a ni, a ti bawk. Zirnna kalphung dik pawimawh zia sawiin India sorkar pawhin zirna pawimawhzia a hria a, tih hmasawn nan theihtawp a chhuah mek a ni tiin engkim hmasawn nan zirna hi a pawimawh a ni, a ti bawk. Thiam tak takna (Quality Education) pawimawhzia sawiin zirna sang zawk zir tur pawhin thiamna tak tak neih hi a pawimawh hmasa ber a ni a ti bawk. Zirlaite an zirlai mai nilova an zir zawh hnu a, an kal zel na kawng tur dap chhuak thiam thei tura zirtir a pawimawh thu a sawi bawk a ni.
He seminar hi Session li ah then niin Session khatna chu Pu Lallawma Bawitlung, Associate Professor, GSC in a kaihruai a Dr. A. Sundaram, Associate Professor, GSC leh Dr. David Lalmuankima, Lawngtlai Govt. College ten paper an present a, Session hnihna chu Pu T. Lalsawmliana, Associate Professor, GSC in a kaihruai Dr. D. Eliyas, Associate Professor leh Ramnghaka, Associate Professor, Govt. T. Romana College, Aizawl ten paper an present bawk. Session thumna Dr. R. Hmingthanzuala, Associate Professor, GSC kaihhruai ah Dr. K. Zohra, Associate Professor, GSC chuan a paper a present bawk a ni.
He seminar session tawp ber chu Pu Thasia T. Azya, Associate Professor, GSC chuan a kaihruai a Rapporteur ten Report tawi an pek hnuah inthlahna (valedictory function) Pu Vanlaltlanchhunga, Lecturer, GSC kaihhruai in neih zui nghal a ni a, Pu C. Zohupa, Principal, Govt. Saiha College chuan certificate semna a nei a, Dr. D. Eliyas, Secretary, IQAC, NAAC, Govt. Saiha College chuan lawmthu sawi na a nei zui nghal a ni.
