Vawiin chawhnu khan Secretariat Conference Hall, New Capital complex ah Coordination Committee on Traffic Management ten thutkhawmna hun an hmang a, Home Minister Pu Lalchamliana chuan he hun hi kaihruaiin Pu Lalhmingthanga, Commissioner & Secretary, Pu Balaji Srivastava, DGP, Pu Vanlalngaihsaka, DC Aizawl, Pu PC Lalhmingthanga, Mayor, AMC te bakah department hrang hrang a memberte an tel bawk a ni.

Home Minister Pu Lalchamliana chuan,”Traffic jam nasa hi mi tin te tan harsatna thlen tu a ni a, traffic jam tih ziaawm anih theih nan hian ngun tak leh uluk takin kan rilru seng theuh turin ka sawm che u a ni,” a ti.

Vawiin thutkhawmah hian Traffic jam nasa tih ziaawm anih theihna tura kawng hrang hrangte sawi ho a ni a, Night parking leh garage endikna kalpui chungchangte, department hrang hrang hmalakna avanga kawng laih te awmze nei zawk a kalpui te, Aizawl khawpui huam chhunga Parking area ennawn te, chak zawka Pollution control endikte bakah Aizawl khaw chhunga lirthei chet velna a awlsam zawk nan a hmalak dan tur hrang hrang sawi ho a ni bawk a ni.