1798/2024-2025

Aizawl the 28th August, 2024 : Tunlaia thalaite damdawi hmansual hluar bera ngaih Codeine Syrup bur 53100 vel zet chu CYMA Kumpuan Committee leh Mizoram FDA duty-ten tukin (28.8.24) zing dar 2:00 khan state pawn atanga rawn phurh luh chu Aizawl Transport Courier Godown pakhat rawn thlenpui a nih laiin an nangching a, dan bawhchhiatna a awm leh awm loh ngun taka endik atan Drugs Rules, 1945 angin hren zui a ni.

Codeine Cough Syrup hi Mizoramah a ruk a rala lak luh leh thehthang a nasa em em a. Damdawi dawr aṭanga damlo mamawh ngawih ngawihten an hmuh zawh loh laiin, a bur ruak erawh hmun tinah a awm rem rum thin a. Hei hian dan lova lak luh leh hralhchhuah a nasatzia a entir a ni. Hetiang damdawi hi naupang chenin an hmangsual a, chhungkua leh khawtlang tibuaitu ber pakhat a ni tawh a ni.

Central YMA Kumpuan duty-te hi an thawkrim em em a, Mizorama heti taka Codeine Syrup lo lut leh thehthang a ni thin hi a bul chhui chhuah tumin zan engemaw zat tlaivarin an chang tawh a. Nizanah FDA nen duty hovin damdawi tamtham tak lo lut chu hmuhchhuah a ni ta a, tha thlah lova beihzui zel a ni dawn tih Joint Operation duty ten an sawi.

Kan ram leh khawtlanga harsatna thlentu, hetianga damdawi fello taka laluta thehthang thinte hi man an nih chuan dan anga na taka hrem an nih theih nana hmalak zel an tum thu leh, tumah dim an nih loh tur thu an sawi bawk.