1797/2024-2025

Aizawl, 28.8.2024: Vawiin chawhnu khan Aizawl DC Er. Lalhriatpuia, District Working Committee on National Foundation for Teachers' Welfare Chairman ni bawk hovin kumin September ni 5 a Teachers' Day hman dan tur leh zirtirtute hamthatna kaihhnawih ngaihtuahin DC Office ah an thukhawm.

Aizawl DC chuan ram leh khawtlang tana zirtirtute hlutna sawiin, ram siamtha tur chuan rilru sukthlek leh ngaihtuahnate a tha zawnga kaihhruai a pawimawh thu leh chumi atan chuan zirtirtute an pawimawh thu a sawi a. Kuminah National Award to Teachers dawng tura Mizoram atangin Pu Joseph Vanlalhruaia Sailo thlan tel a ni chu a ropui a tih thu a sawi bawk a. National leh State level-a zirtirtu tha thlanchhuah phu tam tak kan neih thu sawiin, hetiang kawngah hian nomination thehluh lamah tan lak tha a tih thu a sawi a ni.

Vawiin meeting hian Aizawl District ah chuan Teachers' Day chu zirna in tin te'n an remchan dan angin lawm ni se tiin a rel a. Hemi ni pual hian Aizawl hmun remchanga banner tar dan tur te ruahman in, state level committee in a beisei angin National/State award lo dawng tawhte chawimawi dan tur ruahman a ni bawk.

Vawiin meeting-ah hian SDEO, District Project Coordinator te, I&PR leh zirtirtu association hrang hrang aiawh te an tel a ni.