1796/2024-2025
Prepared by : National Programme for Prevention and Control of Snakebite Envenoming (NPSE), Mizoram
28th August, 2024 : Tunlai hian Mizoram hmun hrang hrangah rulchuk a tam hle a, hemi chungchangah hian Health & Family Welfare Department chuan mitin te fimkhur turin a chah.
1. Furah hian nasa takin rulchuk case a tam thin avangin, mipuite rulchuk theihna laka kan inven fimkhur a pawimawh hle. Rulchuk case hi zan lamah a tam thin avangin, zan a kan pawn chhuahna ah reng reng, torch light eng tha tak nen fimkhur taka kal thin tur a ni.
2. Inbul, huan leh ram lama hnathawk thin ten kut leh ke khuh kim thei thuamhnaw, kekawr, ngalzem leh kawr bantluan, pheikhawk rawng sang leh kutkawr hman uar nise.
3. Rulchuk laka mipuite kan him theih nan, In / Lo leh Huan Thlam bul vel fai taka enkawl thin tur a ni. Rul in a ei thin Sazu te hian rul a koh hnaih thin avangin heng hmun ah te sazu an awm loh nan hmalak nise.
4. Zan mutna ah thosilen zar a phui tak a bilhluh thin tur a ni.
5. Rulchuk tam ber te hi rul tur nei an ni vek lem lova, chutih rual chuan eng rul pawhin mi a chuk hian phili buai lovin zawimuanga rul atang inthiar fihlim tur a ni. Damlo chu thla muan / hnem a pawimawh.
6. A hmuamhma hnaih a inbel pheikhawk, ngun, zungbun, kawnghren, sana leh thuamhnaw inbel te phelh thawl tur a ni. Ngaihthah mai lova, a rang thei ang ber a damdawiin biak pawh a panpui vat tur a ni.
7. Rulchuk na hmuamhma khawih danglam loh nise. A chukna hmun tawn khalh, zai belh a thisen sawr, rul tur fawh chhuah tum leh ramhmul damdawi (traditional practices) hman loh tur a ni. A hmuamhma che tam lo tur a them dawh chung in, damlo veilam delh a mut tir chungin damdawiin pan vat a him ber a ni.
8. Rul chuk tu hriat hian a enkawl kawngah thui tak kawngro a sut avangin a theih chuan a chuktu pianphung chhinchhiah emaw thlalak kawl that nise.
Health Department chuan Rul chuk enkawlna tha zawk mipui ten kan dawn theihna atan hma la in. Kum 2021 – 2022 kum atang khan Mizoram chhunga District Hospital zawng zawng a hman tur Antisnake Venom dah tanin, Kum 2022-2023 atang khan Primary Health Center leh a chung lam sawrkar Damdawiin ah te dah a ni.
Kum 2023-2024 atang khan National Programme for Prevention and Control of Snakebite Envenoming (NPSE) programme chu Mizoram ah kalpui chhoh tan a ni a, he programme hnuaia ah hian kum 2024 chhung hian Health Department chuan kawng hrang hrangin hma a la chho mek a ni:
1. Mizoram Sawrkar hospital zawng zawng a Doctor te pualin rulchuk chungchang training June ni 19-20, 2024 khan buatsaih niin, Doctor hna zawm thar leh Nursing officer te training pek chhoh zel tum a ni.
2. Rulchuk enkawl dan tur Treatment Protocol Hospital tin a tar tur buatsaih niin sem a ni.
3. Rulchuk chungchangah inzirtirna leh mipuite hriattur Doordarshan Kendra(DDK) Live telecast “Rul chuk chungchang a mipuite hriattur” hmangin ni 19.8.2024 khan MZU Zoology Department a Rul lam zirmi Herpetologist leh Health Department a programme enkawltu ten hun an hmang. Hei hi YouTube ah en mai theih tur a dah chhuah a ni bawk.
4. Rulchuk thleng thin te Integrated Health Information Platform (IHIP) daily report hmangin Sub-Center leh Damdawiin atangin nitin report pek thin a ni. Heng report dawnte, Clinical detail study nei thei tur a data lak khawm chhoh turin hmalakna kalpui mek a ni. Hemi hmalakna hian a invenna, enkawldan tur leh policy duan chhoh zel dan tur ah thui takin min puih chhoh beisei a ni. Heng bakah hian Mizoram a rulchuk thleng tam ber, rultuha leh adangte enkawlna tur bik ASV siam kawng a MZU Zoology department ten hma an lak mekna ah a tul ang ang a thawhho zel bakah kawng hrang hranga hmalak chhoh zel tum a ni.
IHIP report-a a lan danin Mizoram pum ah January 2024 atang vawiin thlengin Rulchuk 198 report dawn tawh a ni a, heng rul chuk report kan dawn tawh te zing a enkawl ngai leh damdawiin pan mi 142 zing a mi 135 (95%) te chu sawrkar damdawiin a enkawl an ni.
Issued by : Health and Family welfare Department, Govt of Mizoram
