No.114/2020-2021

Covid-19 avanga ram pum inkharkhipna kalpui mek kara sawrkarin Vegetable Supply Chain a duan ah rin aia thlai a lo tam tak si avangin khawpuia pekchhuah bang te dah that a lo ngai ta a. Hemi chungchangah hi Chief Minister Pu Zoramthanga ruahman na in Horticulture Department in Sairang a Cold Chain Development Project a kalpui mek chu hman tangkai a nih theih nan hmalak a ni a. Tunah hian a bul tan nan “trial run” neiin Cold Room ah Bawkbawn hralh chhuah theih lohte dah chhin tura hma lak a ni.

Horticulture thlaite hi tawih ral hma tak an ni a, thei leh thlai tharchhuah zawng zawng zaa sawmthum (30%) chuang hi chu a tawih ral thin a, hei vang hian a tawih ral mai tur ven leh sawngbawl (Post Harvest Management) hi a pawimawh em em a ni. Hemi avang hian Central Ministry pawhin sum tam tak Post Harvest Management atan hian a dah thin a. Mizoram Horticulture Department chuan Dragonfruit chin lamah nasa taka hma la in, Central sawrkar pawhin tha a ti hle a, State dangte pawhin entawn turin a ti hial a ni. Dragonfruit hi Hi-value crop a nih avangin a thar vanglaia (peak season) hralh bang dah that a, a van hun (off-season) lain huan neitu ten man to zawka an hralh theihna tur ruahmanna ngaihtuahin, Central Sorkar chuan Mizoram tan Mission for Integrated Development of Horticulture (MIDH) scheme hnuaiah Cold Chain Development Project a dah sak a. Central Agricultural University (CAU) atangin he project zirchiang tur mithiam a rawn tir bawk a ni. Department chuan Cold Chain Development project puitlin turin hma a la nghal a. Cold Chain Development hnuaiah hian thil chi hrang tam tak a awm thei a. Entirnan - Integrated Packhouse, Cold Room, Ripening Chambers, Refrigerated Van leh a dangte. Hengte hi hre rengin Department chuan Cold Chain Development project felfai tak siamin Sairang-ah a hmunpui (Main Hub) ruahmanin, Mizorama District hrang hrangte nen Refrigerated Van-a thlunzawm a tum a. Department chuan hemi atana hman turin Refrigerated Van (Vurbawm motor) leh Pick-up Truck panga (5) ve ve a nei tawh a ni.

Horticulture Department chuan he Cold Room etc. buatsaih hna thawk tur hian tender a chhuah a, Rinac India Limited, Bangalore chu thlan a ni a. Anni hi India ram chhung hmun hrang hrangah Thei leh Thlai vawnthatna chi hrang hrang a lo siam nual a. He project hian Manager Quarter leh Chowkidar Quarter a keng tel bawk a ni.

Rinac India Limited hian he project hi Rs. 250.00 lakh in a buaipui a, a building pumpui hi 3950 sq. ft a zau a ni, a chhungah hian Cold Storage Conveyer belt, washing, grading leh sorting tihna te a awm a, Chamber li lai a awm. A building pum pui hi duansa rem khawm (pre-fabricated) niin foundation tha taka siam chungah rem khawm a ni a, a bang hi PUF (Polyurethane Foam) inthuah (sandwich panel) a siam a ni a, a chhung hi power supply tel lo pawhin pawn boruak aiin a daizawk a, thei leh thlai vawn that nan a tangkai hle dawn ani. SE, P & E Department leh a naute nen a power mamawh tur fel taka an en hnuah Transformer a ngaih avangin Rs. 16.72 lakh (Cheng nuai sawmparuk leh sing sarih sanghnih) ni 20th January, 2020 khan P & E Department ah chhun luh a ni.

Vegetable Supply Chain kaltlanga khawpuia thali lakluh zinga bang awm te chu vawn that a nih thieh nan Cold Storage a han dahna mai tur a awm bawk si lova. Hemi chungchangah hi Chief Minister hnenah thlen niin, a ni ruahmanna angin chak taka hma lak nghal a ni a. A concerned Department ie., P&E Department ten 1st April, 2020 khan hma la nghalin an officer rual ten Sairang-ah, a hmun ngeiah vil in, transformer chu hman theiha siamin Cold Storage atan power hman theihin a siam nghal a ni.

He Cold Room hi thlai thar sawngbawl leh dahthatna tura duan a ni a, Integrated Pack House chhungah hian Cold Room chamber lian tak tak pali (4) a awm a, cold room pindan li (4) ah hian a vaiin 800 quintals lai a leng a. Grading na hmunah hian 200 quintals a leng bawk a ni. Cold room hi a hriat awlsam theih dan chuan in lama fridge kan hman ang, Fridge lian pui ang tihna a ni ber. Tin, he cold room ah hian thlai in an mamawh tawk ang zelin boruak vawh zawng (temperature) leh a boruak hnawnna (Relative Humidity) siam rem theih a ni. He Packhouse that leh chang kanna em em chu conveyer belt a awm tel hi a nia, hei hian kan thei leh thlai dah that tur emaw lakchhuah turte awlsam zawk leh rem zawkin a thliar felin a nawr sawn zung zung thei a, mihring tha chakna hmang lovin awlsam tak leh fel takin a thliar fel zung zung thei a ni.