No.113/2020-2021

Vawiin khan Dr. Lalrozama, IAS, Mamit District Bawrhsap/ Chairman, District Level Task Force on Covid - 19 chuan Novel Coronavirus (COVID -19) hrileng mekin Mizoram leh Mamit District min luhchilh lohna tura chhun zan zawma duty Village Level Task Force-te an mahni khaw hrang hrangah tlawhin tanpuina pawisa leh mask a sem nghal.

District Bawrhsap chuan khawvel ram tam takin a buaipui mek leh chhiatna nasa tak thlentu, hripui hlauhawm takin Mizoram mai bakah kan District a rawn luhloh nana khaw hrang hranga khawtlang hruaitute leh tlawmngai pawl kaihruaina hnuaiah VLTF din a ni chu lawmawm a tih thu a sawi a. Hengte a vang hian tun dinhmunah Mizoram chuan chanchin lawmawm tak kan la nei mek zel a ni a ti. Tha thlah miah lova, kan ram leh hnam damna leh himna tura, duty tha taka hlen zel turin a chah a ni.

District Bawrhsap hian Kanhmun khawbula ramri, Medili lui chu tlawh nghalin khawtlang hruaitute nen inkawmhona neih nghal a ni a. Ramri-a lo lut turte veng tura khawtlang hruaitu leh tlawmngai pawl mi inpe-te chungah lawmthu sawiin Kanhmun khawtlang thawhrimna chu fakawm a tih thu a sawi. Ramri bikah venhimna khauh lehzuala kalpui a nih theihna turin venhimna lama thawktute nena tan tlan dan turte sawiho zui a ni bawk.

Chairman, District Level Task Force on Covid - 19 hian tanpuina pawisa hi an khaw dinhmun a zirin Rs 5,000/- leh 4000/- in a sem a ni.

District Bawrhsap hi Pu Lalrinpuia Varte, Addl.SP, Pu Lalthakima, Deputy Commandant, 4th IR, Dr. Vanlalfela, CMO/ Secretary, DLTF, Pu Lalfakawma, Zawlnuam BDO leh Pu Henry Malsawmtluanga, SDC Mamit te'n an tawiawm a ni.