Vawiin (28.07.2016) khan Committee on Local Fund Accounts (COLFA) chuan Local Administration Department (LAD) hnuaia Lawngtlai khawpui chhunga hna thawh hrang hrangte a hmunah an endik a. COLFA atang hian Chairman Pu John Siamkunga, MLA hovin member dang pathum - Pu R.Vanlalvena MLA, Pu Lalthanliana MLA leh Er Lalrinawma MLA te an lo kal a ni.

Chawhma dar 10:30-ah Lawngtlai khaw chhunga Village Council member-te nen Lawngtlai Circuit House-ah inhmuh khawmna hun buatsaih a ni a. He hunah hian Lawngtlai DC Dr A. Muthamma bakah, LADC CEM Pu VL Hmuaka, LAD changtu EM Pu Chhuanawma leh sawrkar official eng emaw zat an tel.

COLFA Chairman Pu John Siamkunga chuan audit report behchhanin, sum pek mila hna thawh a nih leh nih loh endik tura lo kal an nih thu a sawi a. An endik hunah pawh a tha an tih leh tih loh eng mah sawi lo va, review hunah an sawi chauh tur thu sawiin, an thil hmuh chhuah atang chuan report an la siam leh dawn, tih a sawi.

Pu R. Vanlalvena MLA leh Er Lalrinawma MLA te pawhin thu sawiin, khawtlang hmasawnna tura hna thawhte chu COLFA-in a endik zel tawh dawn avangin fimkhur taka hna thawh a tul thu leh sum pawh dik taka hman tur a nih thu an sawi a. Hna thawh tak tak leh file-a a inziah dan chu a inmil tur a ni, an ti bawk.

Committee Officer Pu John Lalrinawma chuan COLFA chungchang leh din a nih chhan te, an hna thawh dan hrang hrangte sawi fiahin, VC-te tana hna thawh dan tur kaihhruaina chu dik taka zawm a pawimawh thu a sawi.

Hemi hnu hian Lawngtlai khaw chhung – Electric Veng, College Veng, Bazar Veng, Chanmary-II, Council Veng, Lawngtlai-I, Salem Veng leh AOC Venga VC-te hna thawh hrang hrang an endik a. He'ng hna an endikte hi - footpath leh foot-step leh vantlang tuikhur siam te, kopang lung rem leh veng chhung kawng laih te a ni a. Hemi hnu hian Circuit House atangin Lunglei panin an chhuak leh nghal a ni.