Vawiin chawhma dar 10.30 atang khan 29.9.2011 thleng awh tur Indian Society for Studies of Animal Reproduction (ISSAR) annual convention chu College of Veterinary Sciences & Animal Husbandry, Selesih-ah neih tan a ni a. Hemi rual hian hmar-chhak bial chhunga ran chi hrang hrangte an chi a mang mai lohna tura an inthlahpun chak zawk dan tur chungchangah India ram pum huapin symposium an nei nghal a ni. He khawmpui hmang tur hian India ram hmun hrang hrang atangin ran inthlahchawnna lama mithiam bikte an fuankhawm a; Lt. Gen. (Retd.) Dr. Narayan Mohanty, PVSM,AVSM,VSM, President, Veterinary Council of India chu khuallian a ni a; Dr. R. Kapthuama, President, Mizoram Veterinary Council chu khualzahawm a ni.

Khuallian Dr. Narayan Mohanty chuan hmar-chhak biala rante zingah a chi danglam bikte humhalh leh inthlahpun theihna tur kawng dap a zau zawka inrawn khawm leh a zirbingna neih chu thil tul tak a nih thu sawiin, hetiang lama mithiamte leh zirlaite tan chona a ni a ti. Dr. R. Kapthuama pawhin thu sawiin, Mizote chu pi-leh pute hun atanga ranvulh uar tak hnam kan nih dan a sawi lang a; vawk phei chu Mizoten a chi hrang kan ngah thu sawiin, Mizo sialte pawh nasa zawka inthlahpuntir dan kawng zawn zel pawimawh a tih thu a sawi.

ISSAR annual convention-ah hian ran inthlahchhawnna lama scientist thawhhlawkte chawimawina leh fellowship hlanna hun hman a ni. He khawmpui chhung hian thupui zirbing tur chi hrang hrang hmangin mithiamten zirtirna an pe dawn a ni. Vawiina khawmpui hawnna inkhawm hi Prof. Gaj Raj Singh, Dean, College of Veterinary Sciences & AH, Selesih chuan a kaihruai.