Vawiin khan Govt. Kolasib College-ah hla phuahtu R.L. Kamlala ‘Mihrinna Hla’ chungchangah seminar neih a ni a, hemi rual hian Bualpuia R.L Kamlala thlan chei thar chu hawn a ni. Seminar hi  Pachhunga University College Mizo Department leh Govt. Kolasib College Mizo Department tangkawp buatsaih niin hla phuahthiam RL Kamlala seminar leh a thlan hi Mizoram University Vice Chancellor Prof. Lianzela’n a hawng a ni.

He hunah hian Prof Lianzela chuan Mizo hla phuahthiamte ngaihhlut pawimawhna a sawi a. Hnam nihna leh hnam timawitu chu thuziakmite an nih thu a sawi a. Kan thiamnate society tana hman tangkai a tul a ni, a ti bawk. 

Seminar-ah hian PUC Mizo Dept. HOD Dr. Lalzama chuan kaihruaiin PUC Mizo Dept, Asst Professor Dr. Zoramdinthara chuan RL Kamlala mihrinna hla chungchang sawina hun a nei a. PUC Principal Dr. Tawnenga leh Govt. Kolasib College Principal Dr. C. Lalmuankima ten thu an sawi bawk a. Seminar Coordinator H. Laldinmawia, Asst Professor, Mizo Dept, PUC chuan lawmthu sawina in hun a khar a. Seminar-ah hian Dr. R. Lalhmangaihi ziak lehkhabu ‘DNA Barcoding of Honey and Polliniferous Plants Diversity’ tih chu PUC Principal, Dr. Tawnenga chuan a tlangzarh nghal bawk a ni. 

Seminar-ah hian Mizoram chhunga College hrang hrang leh University-a mithiam 20 rual thuziak zirho a ni a, zirlai naupangte pawhin paper an buatsaih bawk a. Seminar pual hian RL Kamlala thlan, Bualpuia mi chu PUC chuan an chei tha a, a hungna siamin floor tile an phah thar bawk a ni.

Mizo lengkhawm zai hla phuahtu, RL Kamlala hian Kristian hla 50 chuang a phuah a, hei bakah hian ama inpuanchhuahna ‘Mihrinna Hla’ 9 a phuah bawk a ni.