Mizoram Sawrkar hnuaia College Principal leh Coordinator te puala National Higher Education Mission, Rashtrya Uchchatar Siksha Abhiyan (RUSA) State Project Directorate, Mizoram-in Workshop on RUSA Scheme an huaihawt chu vawiin khan Aizawl College Conference Hall, Sikulpuikawn ah neih a ni a, Higher & Technical Education Minister Pu R.Romawia leh Parliamentary Secretary Pu H.Zothangliana ten an hmanpui.
Workshop hawnna thu sawiin Minister chuan zirna tihchangtlunna tura Central Sawrkar hmalakna lian tak RUSA Project chu Mizoram tan bung thar pawimawh tak a nih tur thu leh sawihona an hman tur chuan hlawkna a thlen ngei a beisei thu a tarlang a. He Project atanga an sum dawn ang ang te chu College te chuan dik tak leh fel taka hmanga, College tihhmasawnna tura hmang tangkai turin a chah. Kan ramin chaw bawm tin zawn zirna a mamawh tawh tiin Minister chuan degree nei thei lo tan pawh eizawnna tlak thiamna kan inpek theih a tul a ni, a ti.
Khualzahawm Parliamentary Secretary Pu H.Zothangliana chuan College lecturer zingah mithiam tam tak an awm a, Sawrkar chuan Mizorama zirna tihmasawn turin an chungah beiseina sang tak a nei a ni, a ti. College-a thawk mithiam te chu ram siamtu tak tak tur leh mipui hma hruaitu tur an ni tiin tan la thar theuh turin a chah bawk.
Vawiina Workshop on RUSA hi Pu K.Lalnghinglova, IAS, Commissioner & Secretary, H&TE-in a kaihruai a, Technical Session nei chhunzawmin Prof.K.L.Pradhan, Member Secretary, State Higher Education leh State Additional Project Director ni bawk chuan RUSA Scheme chungchanga hmalakna report a pe a, tunhnaia RUSA Project Approval Board Meeting, New Delhi-a neihin Mizoram Higher Education Plan Components 12th Plan Period atana a pawm sak tawh te chu heng te hi an ni :-
1. Government Hrangbana College leh Government Zirtiri Residential Science College te Model College-a hlankai (Upgradation of existing Colleges to Model Degree College) - Rs 2 crores ve ve
2. College 21 te thuam thatna (Infrastructural Grants) - College pakhat tan Rs 2 crores zel
3. Mizoram Engineering College, Lungleia din - Rs 26 crores
Project Component la pawm sak rih loh te pawh bawhzui zel a nih thu sawiin Prof. K.L.Pradhan chuan RUSA Scheme kalphung a sawifiah a. College hrang hrang Principal leh Coordinator ten an College-in infrastructure a mamawh zual RUSA Project sum hmanga siam leh thuam that theih te Workshop ah hian pharhin sawihona neih a ni. Higher & Technical Education hmasawnna tur leh RUSA Project sum te dik tak leh a tangkai thei ang bera hmang tura College-a thawktute tih tur leh mawhphurhna te sawiin nilenga hun hman a ni.
