Lok Sabha MP Pu C.L.Ruala leh Rajya Sabha M.P. Pu Ronald Sapa Tlau ten Model Village atana an thlan Khawlailung leh Chhiahtlang khua a hma la tura ruat bikte tan a training “Training on Participatory Planning of SAGY” chu vawiin chawhnu dar 1:30 khan Serchhip District Bawrhsap Pi Juhi Mukherjee, IAS chuan Serchhip DC Conference Hall ah a hawng. Ni 5 awh tur training hi State Institute of Rural Development (SIRD) buatsaih niin January 26-31, 2015 chhung a awh ang. District-Level Committee on SAGY memberte leh SAGY hnuaia din sub-committee hrang hrang member te an tel a ni.

Training hawnna thu sawitu District Bawrhsap chuan India rama hmasawnna dik leh ngialnghet a awmtheihna tur chuan chung lam atanga thuneitu ten engkim an ti thin hi a dik famkim lova, mipuite a hnuai lam atanga an tel ve a pawimawh a, hemi atan hian India sawrkar chuan 73rd leh 74th Constitutional Amendment siamin Panchayati Raj Institution a din a, mipui zawng zawng telna Gram Sabha din in an hnen thleng pha hmasawnna hna thawh kawnga ngaihdan leh duhdan te an neih theih nan a ruahman a ni a ti a, mahse Gram sabha ringawtin engkim a tithei lova, mithiam zawk leh fing zawkte nen an thawh ho a ngaih avangin inpawh tlang tak leh rilru thianghlim tak pu chunga an thawhho thiam a pawimawh a ni a ti a, heng khaw pahnih te enkawl dan tur “Village Development Plan (VDP)” hi May ni 11, 2015 ral hma a peihfel vek a tul thu sawiin, VDP an buatsaih kawngah pawh mipuite ngaipawimawh a an thu leh hla ngaihthlak sak turin trainees te a chah a, mipuiten an hriatthiam loh leh an buaina te pawh dawhthei taka hrilhfiah zel a lungawi tlang taka hnathawh anih theih nan theihtawp chhuah turin a fuih bawk a ni.

Training hawn inkhawm kaihruaitu Pi Teresy Vanlalhruaii, MCS, Project Director, DRDA Serchhip, SAGY Charge Officer ni bawk pawhin SAGY pawimawhzia hre turin trainees te a chah a, Mizorama a hmasa ber atan Serchhip District ami ve ve Model Village atan thlan ani chu lawmawm tak anih rualin chona lian tak ani a ti a, theihtawp chhuah a hna an thawh phawt chuan khaw pahnihte hi ‘model village’ khaw entawntlak ah an chhuah thei ngei dawn a ni tih sawiin an thil zirah ngaihtuahna pe a rilru sawr bing turin a chah bawk.

Hawnna inkhawm neih zawh anih hnu hian SAGY thil tum leh awmzia inzirtir anih bakah, hmalak dan turte, ruahmanna siam dan tur te inzirtir a ni a, sawihona hun hman a ni bawk.

Pu Khawlsiamthanga Khawlhring, Dy. Director, SIRD, Dr. Lalhruaitluangi Sailo, Core Faculty, SIRD leh Pu Z.R. Thafala, Core Faculty, SIRD ten zirtirna hi an pe a ni.