Vawiin khan Planning & Programme Implementation Minister Pu Lalsawta’n Secretariat Complex, Khatla-ah Directorate of Science and Technology Office Building sakna tur lungphum a phum a. Building lungphum-na function ah hian Parliamentary Secretary Pu K. S. Thanga pawh a tel a ni.
Pu Lalsawta chuan Science leh Technology hi tunlai khawvelah a thang zel a, ramdangte ke pen ruala ke kan pen theih nan science thiamna kan hman tangkai zel a ngai a. Hmasawnna tluantling nei turin scientific based plan neih a ngai a, hemi atan hian Science leh Technology hmanga ruahmanna tha kan neih zel ka beisei a ni, a ti a. Sawrkar chuan Department tin ten anmahni office building theuh an neih hi a duhin a ngai pawimawh a, tunah Directorate of Science & Technology Office building sak theih tura kalpui theih a ni ta hi lawmawm hle a, he Office building atang ngei hian Science leh Technology thiamna hmanga Mizoram hmasawnna tur an buatsaih zel theih ka beisei a, ka chah duh nghal bawk a ni a ti.
He lungphum hawnna inkhawma inlawmna thu sawiin Planning & Programme Implementation Secretary Dr. C.Vanlalramsanga chuan Science & Technology in an office building tur an nei thei dawn ta hi a lawmawm hle a tiin Department lam pawhin neitu rilru puin a sak hna te vil turin a ngen a ni.
He Building sakna tur Technical Report chu PWD Superintending Engineer Pu Bowman’n a tarlang a. Science & Technology Directorate building tendered amount chu cheng nuai 538.53 niin chawng ruk a sang a sak a ni dawn a. He building Total Build up Area (a chawng zawng zau zawng belhkhawm) chu 2178.98 m2 a ni dawn a, leihnuaiah tui litre 50000 vel dawhkhawmna tur bakah motor 11 vel dahna tur garage a awm tel dawn bawk a ni. He building hi thla 24 chhunga sak zawh tura ruahman niin a satu contractor chu Pu Sangpuia, Class I Contractor a ni.
Inkhawm kaihhruaitu Chief Scientific Officer Dr. Vanlalzara chuan he building-ah hian Directorate of Science & Technology a Officer leh staff te bakah Mizoram Remote Sensing Application Centre (MIRSAC) leh Mizoram Council of Science & Technology a Officer leh staff te pawh leng vek tura ruahman a nih thu a sawi.
Principal Scientific Officer leh Project Director (MIRSAC) Dr. R.K.Lallianthanga chuan he Directorate of Science & Technology office building sakna atana theihtawp chhuahtu zawng zawngte chungah lawmthu sawiin hun a khar.
He lungphum inkhawmah hian Pi Nandini Paliwal, Special Secretary, Planning Department-a Officer te, Directorate of Science & Technology Officer leh staff te, MIRSAC Scientist leh staff te leh Mizoram Council of Science & Technology a Officer te leh staff te leh Directorate of Economics & Statistics a Officer leh staff te thahnem tak an tel a ni.
