School Education Minister Pu H. Rohluna chuan zirna tihhmasawnna kawngah zirlaite pawimawh zia leh, hrethiam mang lova zir ve ngawr ngawr ringawt chuan mi chhawrtlak a siam theih loh thu sawiin, “college zirlaiten mahni degree phu tawk thiamna an zirchhuah ngei a ngai a ni” a ti. He thu hi vawiina Govt. Aizawl West College Week 25-na kharna hun, Electric Veng YMA Hall-a neih a hmanpui naah a sawi a ni.

Minister Pu H. Rohluna chuan tunlaiah zirna leh hna zawn naah competition a nasat tawh sia leh, Mizo zingah All India service a tling an tlawm tawh zia sawiin tuna zirlai ni mek hun tha la nei ten chutiang lamah chuan an ngaihtuahna dah se a ti a; midang tih theih chu an ti ve thei a ni tih hi zirlaiten hre turin leh a duh thu a sawi a. Education Minister chuan midang aia zirna lamah chaklo a inhria chuan mi aiin zirna hun an pek tam a, a thiam theite tan pawhin taimakna tello chuan awlsam taka hlawhtlinna chan a thiehlo tih hre bawk tura a duh thu sawiin, zirna lamah inelna hrisel tak zirlaiten an neih a pawimawh thu a sawi a ni.

Minister chuan Sorkarin zirna tihhmasawn a ngaihpawimawh thu leh kawng hrang hranga hma a lak dan a sawi a. Zirna in, elementary lamah a ni emaw zirna in sang lamah a ni emaw, hmasawnna ruhrel tha tak siam chhoh mek thu te sawiin, hmunhma tha leh changtlung zawk siam a nih rual hian result tha zawk leh thiamna hmantlak a thlen phah tur a ni, a ti a. Hmasawnna in a ken tel internet leh social media te hi a tawk chauhva hmang thinte tan thil tangkai tak a nih laiin hmang thiamlo tan chuan mahni nih theih ve tur ni phaklo dinhmuna min dah tu a ni thei bawk a ni, tiin social media leh internet te a tawk chin chauhva hman dan hriat a pawimawh thu a sawi bawk.

Govt. Aizawl West College Week kharna hunah hian week chhunga inelna hrang hranga lawmman semna neih niin, Minister hian lawmman a sem a. College Principal Dr. P. Lalremliana pawhin he hunah hian thu sawiin, zirlaite chu kawng engkimah hmasawn tum zel turin leh an zirna ah theihtawp chhuah theuh turin a chah a ni. Tun dinhmunah Govt. Aizawl West College-ah hian zirlai 862 an awm mek a, Teaching Staff 36 leh 15 Non-teaching Staff 15 an awm bawk.