Vawiin chawhma dar 10 khan Government Champhai College chuan College Week kharna hun Multipurpose Hall, Govt. Champhai College-ah an hmanga. He hun ah hian Champhai North bialtu MLA Pu TT Zothansanga chu khuallian a ni. 

Khuallian chuan ram leh hnam humhalha vawnghim tur chuan huaisenna, taihmakna leh inpekna  a pawimawha, chumi nei tur chuan thiamna ziktluak leh dik neih angai a ni, a ti a. A thiam thei apiang hlawhtling ber an ni lova, taima leh rinawm taka bei tang tangte an hlawhtling thin a ni,  a ti a. Mizoram siamtha tur chuan mimal tinte kan pawimawh thu sawiin ,”Hei lo hi ram dang kan nei tawh lova, thangtharte kan hnutchhiah tur ram nuam siam turin tan ila zel ang u”, a ti a. Nakin lawka hnam dang mi te awpbehna hnuaia kan awm lohna turin tan lak a ngaih thu a sawi a. Central service lama tam zawk  luh theih nan College zirlaite chu tang sauh sauh tur leh exam theih apiang exama, a tam thei ang ber inziaktlinga officer tam zawk Champhaiin a neih ngei theih nana tan la turin a fuih a. Thawh hreh nei lo tur leh hnam dang tih theihte chu ti ve  zel thei tura fuihin ,”Zoram hi amah maiin atang thei lo, a chhunga chengte hi tih tak zeta kan tan a ngai a ni”, a ti a. Social media chu hman dan thiama, mite beihna atana hmang lovin a nihna tur dik tak zirlaipuitu atana hman thiam a tul thu a sawi a. Hun vawn dik chungchangah tunlai thil tih nikhua reng renga kan tlai ta fo chu hnam ral tur zia a ni ang tih a hlauh thu a sawi a; Zirlaite chu a hun taka kal thin tur leh hma hruaia hun hman dik kawnga entawntlak ni turin a chah a. Bialtu MLA chuan Urinal Shed Fund atangin College chhungah Zun In siam anih tur thu leh College Bus pawh sawkar term thar lamah pek a tum thu a sawi a. College Building thar pawh nakum January-February chhunga hawn a nih tur thu a sawi bawk a ni. College hmasawnna leh siam that kawnga thawktu zawng zawngte chu fakawm a tih thu a sawi a. College zirlaite chu an zirlai theuhah thiamna tak tak zir chhuak tur leh taihmakna leh tumruhna nena beia hlawhtling tum theuh turin a chah nghal a ni.

Vawiin College week closing programme hi Tv. Samuel Vanlalbiakchhana, Gen. Secretary, Students’ Union (SU) in a kaihruaia. Thusawina Pu Lalnunmawia, College Principal leh Pu V.Suakbuanga, EX-Principal ten an nei a. Games & Sports Secretary-in  report leh College Week result puanna a nei a. Item benglut tak tak Mal zai, hnam lam leh Cultural parade te entirna leh ngaihthlakhona neih a ni a. Tv. Lalhruaitluanga, Vice President, SU-in lawmthu sawina hmangin chawhma lam hun a khar a ni. Chawhnu lamah Intihhlimna hun hmangin ruai theh nghal ani.

College Week-a ti tha ber lawmman pakhatna latu chu Blue House-te an ni a. Mimal chawimawina Best Athlete men-ah Tv.Lalnunmawia Red House leh Best Athlete Female-ah Nl C.Lalhmangaihzuali, Green House- te thlan an ni a. College Week-hi September ni 13 atanga 21 chhung khan neih a ni a. Govt. Champhai College hi kum 1971-a din a ni a. NAAC accreditted B++ a ni bawk.

Champhai North bialtu MLA hi Pu Lalrammawia, SE, PHE leh Dr. Lallawmkima, DIPRO ten an tawiawm a ni. Pu TT Zothansanga chuan chawhma programme a hmanpui hnu hian Govt Champhai College infiamna hmunhma tur a duan mek field  a tlawh nghal bawk a ni.