MPSC hnuaia service hrang hrang atana officers lak thar, tuna Administrative Training Institute (ATI) Aizawl a Combined Foundation Course kal mek te chuan an training programme pakhat - Courtesy Call an neih chhunzawm.
Vawiin hian trainee te hian Aizawl DC, Dr Franklin Laltinkhuma chu a office ah tlawhin, Aizawl DC office a Branch hrang hrang te leh an hnathawh dan te an in hrilhfiah a, chubak ah trainee ten zawhna an neih te DC hian a chhang bawk a ni.
Aizawl DC an tlawh zawh hian Agriculture Department Commissioner chu tlawh tura ruahman a ni a, mahse Commissioner hi sorkar tul pawimawh (Plan Discussion) neia Delhi lama a thang bo lai a nih avangin a aiawhin Director (R&E), Agriculture Department Pu Lalnithanga leh Crop Husbandary lama officers ten an lo dawngsawng a ni.
Director hian Mizorama Agriculture Department chanchin leh a kalphung te chipchiar takin a hrilhfiah a. Hei bakah hian 12th Plan chhunga Mizoram a Agriculture dinhmun pawh trainee te hi a lo hrilhfiah bawk. Trainee ten awhna an neih ang ang te Director leh Department officers ten an chhang bawk.
Hei bakah hian trainee te hian Principal Secretary Industries Department leh Secretary Co-operation te tlawh hmabak an la nei bawk.
ATI zirlai te hi Course Director Pu Lalrammawia, Jt. Director (Training) ATI in a hova, zirlai te hi an vaiin 20 niin MCS - 12, MIS - 4 leh MF&AS - 4 an ni.
