Mizoram sorkar Taxation Department chuan sorkar kum kalta 2012-13 chhunga an hnathawh thlirletna leh kum thar 2013-14 chhunga an hmachhawp hrang hrang te thlirlawkna hun vawiin khan I&PR Conference Hall-ah nilengin an nei a. Meeting bul tan inkhawmah hian Taxation Minister Pu Zodintluanga leh Principal Secretary Pu RL Rinawma ten an telpui a ni.

Commissioner of Taxes Pu Lalthangliana Varte kaihhruai inkhawma thusawitu Taxation Minister chuan kum kalta chhunga an sum lakluh tur bithliah tha taka an khum avangin lawmthu a hrilh a. Kum kal mek atana bithliah pawh khum leh ngei turin a fuih a ni. Pu Zodintluanga chuan kum kalta chhunga an target cheng vaibelchhia 170.27 chu cheng vaibelchhia 184.96 a khumin an khumna ringawt pawh vaibelchhia 14.69 lai a tling thei a ni, a ti a. Kum kal mekah hlen tura bithliah chu cheng vaibelchhe 190 zet a ni thung, a ti. Taxation Department chu computerization chungchangah hma an sawn nasa hle tih sawiin sumdawng te tan pawh hman nuam leh remchang tak a ni, a ti a. Hun tam tak senga office dawr tura kal ngai lova information technology hmang tangkai a an tapchhak zawl atang leh khawvel khawilai hmun atang pawha an hman theih tur an chhawp chhuak hi mipui te tan awlsamna nasa tak siamsaktu a ni, a ti bawk. Minister chuan department building nei tura hma an lak mek chuan rah tha a chhuah a, hmun leh sum pawh tihfel a ni tawh, a ti a. An hnathawh dan milin ramchangkanga an neih ‘smart building/ intelligent building’ anga sak tura ruahman a ni, a ti bawk.

Thusawitu dang Taxation Department Principal Secretary Pu RL Rinawma chuan he department hi Mizoram sorkar hnuaia chhhiah atanga sum la luttu awmchhun a ni tiin an sum lakluh thin te hi pung zel tur leh a department pawh thang zel tur a ni, a ti a. An hnathawh tihchak nana dan leh hrai an mamawh ang zel siama sorkara rawt thei an nihna te inhre tur leh tunlai khawvelah computer thiamna hmang tangkaia hnathawk tur an nih avangin officer leh thawktu zawng zawng te chu intuaihriam sauh sauh turin a chah a. Sorkara an department hamthatna tur leh inzarpharhna tur rawtna an thlen te pawh chak taka bawhzui zel a tul thu a sawi a ni.

Taxation Department hian mipui ten awlsam zawka mahni inlum atanga chhiah leh thildang an pek theih nan service hrang hrang a siam a. eCST Forms, eFilling of Invoices, ePayment, eRegistration, eReturn, eWaybill te bakah sms integration leh heng ho hman theihna tura buatsaih website www.zotax.nic.in te hi sumdawng ten an tangkaipui hle.

Chawhnu lamah technical session neiin kum kal meka an hmachhawp hrang hrang te zirhona an nei a. Vawiin meeting-ah hian Mizoram chhunga Taxation Officer an tel kim hle a ni.