4924/2025-2026 

Aizawl, 19th March, 2026: Vawiin khan Pu M.S Dawngkima, MPS, Commandant, 1st IR Bn., Mualvum chuan Mizoram Police hnuaia Havildar atanga Sub-Inspector (AB) a kaisan (promotion) hmu thar, 1st IR Bn. ami mi 10-te hnenah Rank Badge beltirna hun a hmang.

Tun hnaia Mizoram Police hnuaia Havildar atanga Sub-Inspector(AB) kaisan na tura intihsiakna, Departmental Promotion Examination neih zawh takah khan 1st IR Bn., Mualvum atang hian mi sawm (10) laiin hlawhtlinna changin promotion hi an hmu a. Heng hlawhtlinna changte zingah hian Mizoram pumah a titha ber dinhmun (1st Position) hauh tu an awm chu chhuanawm an tih thu tarlan a ni.

He hunah hian Commandant Pu M.S Dawngkima chuan kaisan tharte hnenah hian Sub-Inspector (AB) rank hi beltir nghalin, lawmpuina thuziak (citation) leh Cash Reward a hlan bawk a ni.

Kaisan tharte lawmpuina thu sawiin Commandant chuan, Mizoram huap inelna hmachhawn tur hian nikum lam atangin Battalion ang pawhin nasa takin an lo inbuatsaih tawh thu a sawi a. Rim taka an beihna avang leh Pathian malsawmna zarah a titha ber dinhmun hial 1st IR Bn., Mualvum-in an hauh thei chu lawmawm a tih thu sawiin, he hlawhtlinna hi 1st IR Bn., Mualvum tan chauh ni lo, Kolasib District tan pawha thil chhinchhiahtlak tak a nih thu a tarlang bawk.