Vawiin chawhma dar 11:30 khan Commerce & Industries Department chuan District Industries Centre, Lunglei ah NLUP 3rd & 4th Phase hnuaia tailoring trade thlangtute hnenah tanpuina an sem a. Parliamentary Secretary leh Khuallian ni bawk Pu Joseph Lalhimpuia chuan beneficiary-te hnenah tanpuina a hlan a ni.

Pu Joseph Lalhimpuia chuan Industries Department chu department upa a nih angin, kaihhnawih leh enkawl a ngah a, NLUP hnuaiah pawh department in a tir a ruahmanna a neih lawk lem loh eizawnna te dah belh a nih avangin, a hautak in a khawtlai phah thin a ti a. Industries department chu NLUP bikah hma la chak ber te zingah tel in, tailoring-ah pawh 3rd installment chiah sem an hmabak thu a sawi. Parliamentary Secretary chuan puanthui khawl te chu man tlawm thei ang bera department-in a leisak hnu in, beneficiary-te hnenah a leina bang a pe dawn a, chu chuan sawrkar hmel a ti lang chiang hle a ni, a ti a. Thahnemngai taka khawl tha thei ang ber sawrkarin a pek angin, a dawngtute pawhin thahnemngaih lehzualna an neih a duh thu a sawi.

Department-in Lungleia hmalakna te tarlang in, Pu Joseph Lalhimpuia chuan Skill Development Training Centre leh Knitting & Tailoring Training Centre te sak mek an nih thu a sawi a. Mizorama NLUP Emporium hmasa ber tur pawh sak mek a nih thu a sawi.

Industrial Promotion Officer Pu F. Lalsawmliana chuan technical report a pe a. 3rd Phase hnuaiah beneficiary 53 leh 4th Phase hnuaiah beneficiary 16 awm in, beneficiary tin te hian puanthui khawl chi thum – Embroidery, Overlock leh Foot Sewing machine an dawng a ni. Heng puanthui khawl set khat theuh an dawn bakah khawl leina bang cheng 21,480/- theuh pek an ni.

NLUP semna programme hi Lunglei District Industries Centre General Manager Pu Lalhmunsiama’n a kaihruai a, Superintendent Pu Lalzara Sailo in lawmthu sawiin a khar a ni.