No.6806/2020-2021

Vawiin khan Commerce & Industrial Development Board chu an Chairman, Commerce & Industries Minister Dr R.Lalthangliana leh Vice Chairman Pu C.Ramhluna hovin SAD Conference Hall, MINECO ah an thukhawm. Board meeting vawi 7-naah hian agenda 10 chhawpchhuah a ni.

The Mizoram Industrial Policy 2020 (Draft) chungchang sawiho niin Board meeting hmasa zawkah pawm a nih tawh angin a chhunzawm zel dan tur chu official-te kutah dah a ni a, Board hnuaia Drafting Committee chuan a rang lamin official-te kutah an hlan ang. Mizoram chu Ease of doing business ranking-ah hmarchhak state te zingah 2-na a ni mek tih tarlan a ni a, India ramin sumdawnna kawnga hma a sawn theih nana sawrkar laipui hmalak mekna hi Mizoram pawhin a chhawr tangkai dan tur zirchianga, bawhzui nise tih a ni.

Commerce & Industries Minister Dr R.Lalthangliana chuan ramria insumdawntawnna chungchanga hmalakna Mizoram Sawrkarin a ngai pawimawh tih sawiin Commerce & Industrial Development Board member-te nen ram ria insumdawntawnna hmun te a tah tawlha tlawh a, zirchian tul a tih thu a sawi a. Myanmar leh Bangladesh ramria insumdawntawnna hmun Zokhawthar, Saisihchhuah, Hruitezawl, Zorinpui, Kawrpuichhuah, Silsury, Bungkhawkai, Saikhumphai, Chakhang leh a dangte hmasawnna tur ngaihtuah a, border trade changtlung zawka kalpui dan tur uluk taka ena, hmalak chhunzawm zel dan tur ngaihtuah tul an tih thu meeting ah hian sawilan a ni.

Vawiin Board meeting thu rel zingah  SEDP hnuaia Commerce and Industries bikah sawrkar kum thara trade hrang hrang leh beneficiary thlan dan tur chungchang chu chhawpchhuah niin trade tihpun rawtna awm chu Working Group Committe ngaihtuah tura dah a ni a. Mizoram Food Processing Society rawtna anga food processing lam hawi trade te SEDP a rinluh chungchang pawh Working Group zirchian leh ngaihtuah tura dah a ni bawk.

State Innovation Cluster Concept chungchang te, Mizoram chawm thei tur brick industry din kawnga hmalakna te, Mizoram Food Processing Research and Training Centre chungchanga rawtna te, Industries Association aiawh Board Member-a ruat thar chungchang te leh thu pawimawh dangte meeting-ah hian an rel a ni.

Pu K.Lalsawmzuala, Commerce & Industrial Development Board Member chuan Industrial Estate sak nan a thlawnin Mizoram Sawrkar hnenah Commerce & Industries Department kaltlangin Saitual District chhunga ama mimal ram bigha 8-a zau chu a thlawnin a pe a, vawiin meeting-ah hian Commerce & Industries Minister hnenah ziakin a hlan a ni.