No.6807/2020-2021

Dated Champhai, the 8th December, 2020: Mizoram sawrkar Cooperation department buatsaihin vawiin khan Hnahlan Grape Farming & Processing Cooperative Society Ltd. member-te hnenah Prime Minister Van Dhan Yojana (PMVDY) kaltlangin hnathawhna tur hmanraw hrang hrangte sem a ni. He hun hi Pu Lalrinsanga, MSCS, Registrar, Cooperative Societies, Govt. of Mizoram chuan khuallian niin a hmanpuia, PMVDY hnuaiah hnathawhna hmanrua  suahdur, bawngtuthlawh, sâm chem leh thirtiang chhungkaw 210 te hnenah a semchhuak.

He hun Hnahlan Winery-a hmanah hian Pu Lalrinsanga chuan Van Dhan Mission hnuaiah Minimum Support Price (MSP) scheme kalpui anih dawn thu leh MSP chu ram hnuai atanga  thil thar chhuah tenau Minor Forest Produces (MFP) in a huamte tan chauh pek theih a ni dawn a ni, a ti a.  November thlaah MSP atan  item 14 rawn telh belh leh anih avangin tun thlengin item 87 ah te MSP kalpui theih tawh niin, MSP-MFP scheme kal puina tur hian TRIFED leh State sawrkarte chuan 75:25 in an in  tum sem dawn thu a sawi a. MSP atana sanction kan hmuh hmasak ber hi Mizoram puma tan cheng nuai 122 ani a,  TRIFED  tum tur cheng nuai 91.50 chu  la pekchhuah loh niin, Mizoram state tum tur chu hun reiloteah  hmuh beisei a ni, a ti bawk.

Cooperative Societies Registrar chuan MSP-MFP scheme atan VDVK level business plan siam tum anih thu leh Plan

siam sanction milin Society (VDVK) hnenah an member-te  hnen atanga MFP lei khawmna atan fund Cooperation Department in a  pek chhuak thin dawn thu a sawi a. VDVK zawng zawngte tan Warehouse leh Haat bazaar  ruahman vek anih thu pawh tarlangin, fund dawn anih ve leh Society (VDVK)-te hnenah pekchhuah  nghal tur a nih thu sawiin, sum harsat rih avangin procurement plan pawh siam tam ngam anih rihlo thu a sawi a. MSP scheme atana pro rata 75:25 chu 90:10 a tihhniam anih theih chuan VDVK-te tan a tam thei ang ber MSP pek theih beisei anih thu a sawi bawk.

Hnahlan Grape Farming & Processing Cooperative Society Ltd. memberte chu PMVDY hnuaia hmanraw pawimawh tak tak an dawnte tangkai taka hmang tur leh Sorkarin a  pek chhan ang taka hmasawn nana chhawr tangkai thiam turin a chah a. Covid-19 leh ramri buaiin intodelh a tul zia a rawn pholanga, Sorkar leh Department-te pawhin  he mihawi zawnga ke kan pen mekah hian keini Cooperative Society member-te hian tun ai hian tan la leh zual ila, vawiin a kan hmanrua dawn hmang hian intodelhna lamtluang zawh i tum ang u, tiin Society member-te a sawm nghal a ni.

Pu C.Vanlalhruaia, ARCS Champhai & Nodal Officer, PMVDY chuan Prime Minister Van Dhan Yojana chu  India rama Tribal mite hmasawnna tur atana Scheme pawimawh tak Ministry of Tribal Affairs kaltlanga April Ni 14, 2018 a bultan anih thu leh Tribal Cooperative Marketing Development Federation of India (TRIFED) chu kutke pawimawh taka hmang chungin  State Sorkarte nen tangruala PMVDY chu  kalpui a ni, a ti a. Van Dhan Mission tum bulpui ber chu Tribal te'n an chhehvela ramngaw hausakna hmang tangkaia intunnun nana an hman theihna tura ruahmanna siam niin, awmze neia Tribal mipuiten an chhehvela ramhnuaia thil thar chhuahte an mahni ngeiin an sawngbawla, a hralhna thlenga an kutken theihna tura sawrkar laipui scheme duan a ni, a ti bawk.

Van Dhan Scheme Mizorama hman anih ve theihna turin  January Ni 23, 2020 ah Secretary, Ministry of Tribal Affairs Govt. of India aiawhin Regional Manager (NER) TRIFED, Guwahati leh Secretary, Cooperation Department Govt. of Mizoram te'n thawhhona thuthlung MOU an ziahfel thu pawh tarlangin, MOU in a sawi angin Cooperation Department Govt. of Mizoram chu Van Dhan Scheme chungchanga Mizorama hmalakna reng rengah Nodal Department atana thlan a ni a,  Registrar Cooperative Societies, Mizoram, Aizawl chu implementing agency ani a ti bawk.

Van Dhan Mission Mizoram Scheme first phase atan Kendra 44 thlan niin, tunah hian heng Kendra hrang hrangah te hian training leh hmanrua semna pawh neih chhoh mek a ni a. Champhai District hnuaia Kendra pahnihah  first installment fund atangin training leh hmanruate sem zawh a ni tawh a ni. Tunah hian second phase tur kendra thar 115 te tan cheng nuai 1725 zet ruahman thar leh a ni a. Hnahlan VDVK tan first phase PMVDY hnuaia kendra pakhat Hnahlan VDVK tan training DIU Champhai leh Hnahlan Grape Farming & Processing Society Ltd. tangkawpin an buatsaih tawh a ni. 

Van Dhan Yojana hnuaia hnathawhna hmanruate semna hun hi Pu C.Vanlalhriata, Hnahlan Grape Farming & Processing Cooperative Society Ltd. chuan kaihhruaiin an pawl Secretary Pu F.Laltlankima'n report a pe a. Upa K.Khawremsiama'n hunserh hmangin hmanruate a hlan a. Pu Lalmuanpuia CAO Champhai leh Hnahlan VCP Pu Lalremruata Cherput te'n  thu an sawi bawk a. Pu C.L Thianga, Vice Chairman, Hnahlan Grape Farming & Processing Cooperative Society Ltd. chuan lawmthu sawiin hun hman hi a khar a ni.