Revenue Minister Pu R. Romawia hovin vawiin khan Ramhlun Indoor Stadium ah Commerce & Industries Department hnuaia NLUP dawng tura thlanchhuah mi 363  hnenah NLUP 4^th Phase Final Installment sem a ni a, Khual Zahawm Pu H. Liansailova, Vice- Chairman, State Planning Board niin, Pu PL Thanga, IAS (Rtd) NLUP Implementing Board Vice-Chairman pawhin he hun hi a hmanpui a. Commerce & Industries Department hian East Tuipui Cluster leh Lengteng Cluster tih loh ah chuan NLUP sem tur an neih te an sem zo vek tawh a; heng Cluster pahnih ah pawh hian NLUP 4^th Phase final instalment sem turin engkim an inpeihfel vek tawh a, Sawrkar hotute thu an ngaichang mek a ni.

Vawiina NLUP semtute hma a thusawitu Khuallian Pu R.Romawia chuan NLUP tobul leh Sawrkarin NLUP a ruahman chhan te a sawifiah bakah NLUP vanga Mizoram chhunga pawisa leng vel a tam tak thu leh chu chu Mizoram Economy chawisanna atana hmanraw tangkai tak pakhat anih thu sawiin NLUP chu Mizoramin hma nasa lehzuala a sawn a, kan chhehvel hnamdangte aia kan san zawkna tura hmanraw pawimawh tak ani a ti bawk.

Pu R.Romawia chuan Sawrkarin New Economic Development Policy a kalpui mek chu miretheite lam hawi bawk anih thu sawiin NEDP chu NLUP hlawhtlinna par vul tir tu tur a ni a ti a, NEDP hnuaih kuthnathawktute tharchhuah phurh na tur kawngpui leh link road siam, an tharchhuah hralhna tur Market rin tlak buatsaih bakah Cold Storage leh Kudam te pawh sak anuh dawn thu a sawi a. NLUP dawngtute chuan heng te hi an chhawr tangkai ngei an duhthusam anih thu leh beiseina sang tak nen an lo thlir dawn thu a sawi bawk.

Khualzahawm Pu H.Liansailova chuan NLUP kaltlanga hmalakna zarah mipui nawlpui tan kawl a eng chho mek zel a ni a ti a, NLUP chu mithatchhia siamtu ang lek a sawitu an awm thu leh hetianga tawngkam cheh tu te chu miretheite dinhmun diktak hriathhiampuilo tu leh itsiktu an ni a ti a, NLUP dawn avanga thatchhiat ngawt nachhan tur awm a a hriatloh thu a sawi bawk.

NLUP Implementing Board Vice Chairman Pu PL Thanga pawhin thu sawiin Commerce & Induastries department a thawktute thahnemngaihna leh tan lakna avanga tun hun an thleng thei chu lawmthu a sawi a, NLUP buaipui tan anih atanga tun dinhmun an thlen dan kimchang taka sawiin NLUP in a hrinchhuah Mizorama hmasawnna hna thar thawh tur inchhawp mek te chanchin a sawi bawk a. NLUP sawichhiatna chi hrang hrang te chu anmahni cho thar tu anih thu leh tha thlah lova fimkhur lehzuala tan lak tirtu anih thu te, hlawhtlinna tam zawk an hmuh nachhan anih thu te a sawi bawk. NIB Vice-Chairman hian  NLUP Apex Board member te leh Line Department hrang hranga thawktute chungah that ala an thawhhona avangin lawmthu a sawi bawk a ni.

Commerce & Industries Deparment hnuaiah hian NLUP beneficiary 13,798 awmin NLUP tanpuina sem tur pawisa Rs 1,150,474,678/- an hmu a, hei bakah hian NEDP-NLUP Convergence hnuaiah beneficiary 172 neiin tanpuina Rs. 85,00,000/- sem tur an nei a ni.

Vawiina NLUP 4^th Phase final instalment hi Aizawl district hnuaia Cluster panga  Aizawl East-I (49 beneficiaries), Aizawl North-I(70 beneficiaries), Aizawl North-II (138 beneficiaries), Aizawl North-III (60 beneficiaries) leh Aizawl West-I (46 beneficiaries )a beneficiary 363 te hnenah sem a ni a, Trade hrang hrang 11 sem zingah Petty Trade-I thlangtu tam berin 313 an awm a, an hnenah hian final instalment ah Rs 30,000/- theuh sem an ni a, Handloom thlangtu 26 hnenah Rs. 33,000/- theuh sem an ni a, Tinsmithy thlangtu 3 hnenah Rs. 32,500/- theuh pek an ni a, Blacksmithy thlangtu 3 hnenah Rs. 32,000/- theuh pek an ni a, Steel Fabrication thlangtu 9 hnenah Rs. 33,000/- theuh sem an ni a, Petty Trade-IV thlangtu 2 hnenah Rs. 35,000/- ve ve pek an ni a, Buh herkhawl thlangtu pakhat awmin Rs. 15,000/- pek a ni a, Chhang siamna (bakery) thlangtu 2 hnenah Rs. 36,000/- ve ve pek an ni a, Carpentry-I thlangtu mipakhat awmin Rs. 85,000/- pek a ni a, Cane& Bamboo thlangtu pakhat awmin Rs. 44,000/- pek a ni a, Broom-I thlangtu mipakhat hnenah Rs. 40,000/- pek a ni bawk.

Vawiina NLUP 4^th Phase beneficiary 363 te hnena tanpuina sum sem zat hi Rs. 11,074,500/- a ni.

Vawiina NLUP sem inkhawm hi Pu C. Lalbiakthanga, Addl. Director, Commerce & Industries-in a kaihruai a, Pi R. Lalrodingi, General Manager, District Industries Centre, Aizawl-in Technical Report pe in Pi K. Zothanpuii, Functional Manager, District Industries Centre, Aizawl-in lawmthu sawina hun a hmang a ni.