Vawiin khan Pu Benjamin Lalzama, Addl. DC, Lunglei kaihhruaina in a Office Chamber-ah Swachh Survekshan 2018, India ram khawpui fai inelna neih tur chungchang leh hmalak dan tur meeting neih a ni. 

Swachh Survekshan 2018 hi faina kawnga rampum in hma a sawn zelna tur atan ruahmanna a ni a. Hemi hnuaiah hian India ram khawpui 4,041 thlanchhuahte chu faina lamah tehfung hrang hrang hmanga endik niin, an fai dan indawtin ranking siam sak an ni dawn a. Mizoram chhunga census town 23 te chu he inelna ah hian an vaiin an tel dawn a ni. Lunglei DUDO Pu Andrew Lalhruaia chuan Swachh Survekshan 2018 a tel khawpui thlanchhuah te chuan zawhna chi hrang hrang 500 chuang an chhan a ngaih tur thu te, sorkar laipui atangin a endiktu turte nakum 2018 kum tir lamah an lo kal tur thu te a sawi a ni. 

He thutkhawmah hian inpuahchah dan tur leh hmalak theih dan tur hrang hrang sawiho a ni a. Chung zingah chuan he Swachh Survekshan, 2018 chungchang hi veng tinah muipuite hnenah inhrilhhriatna tha zawk neih a pawimawhzia tarlan niin, School Faina kawng a hmalatu tur school tinah School Swachh Committee din nise tih a ni bawk. Hospital leh Hotel-te pawh faina kawng a inelna ah hian ranking siam a ni dawn a ni. Swachh Survekshan 2018 atan Lunglei khawpui bikah Clean Lunglei chu Brand Ambasadors atana ruat an ni bawk.  

Meeting-ah hian VC, YMA, MHIP, MUP, Clean Lunglei, VC leh he hmalakna tur a sorkar department pawimawh te an kalkhawm a ni.