3404/2024-2025

Aizawl dated 6th December 2024: Vawiin khan Mizoram Sawrkar leh Agricultural & Processed Food Products Export Development Authority (APEDA) tangkawpin Baptist Multipurpose Centre, Falkland, Aizawlah, Mizorama thlai thar chhuah man man zawk a hralh chhuah a nih theih nana thlaithar chhuaktute leh a lei duhte indawrtawnna hun,’International Conclave cum Buyer Seller Meet’ a buatsaih chu Pu F.Rodingliana, Minister, Commerec & Industries chuan a hawng.

Khuallian Pu F. Rodingliana, Minister, Commerce & Industries Department chuan Mizorama kuthnathawktute thar chhuah thlai man man zawk a hralh a nih theihna tur a Sawrkar leh APEDA hmalakna chu lawmawm a tih thu sawiin he hun hi tangkai tak a hmang turin kalkhawmte a chah a. Mizoram chu leilung hausa tak a nih angin hlo tur leh damdawi hman ngai mang lovin thlai hrisel taka thar chhuah a nih thin thu a tarlang. Commerec & Industries Minister chuan kuthnathawktute dinhmun chawikan leh an thawh rah dik tak an seng theih nana hmalak chu Mizoram sawrkarin a ngaih pawimawh thu a sawi a, Mizoram thlai thar chhuah te ram chhung leh pawn ah man man zawk a hralh a nih theih nan ‘Buyer Seller Meet’ chu hman tangkai a pawimawh thu a sawi.

He hun hmanpuitu Pu Khilli Ram Meena, IAS, Chief Secretary chuan kuthnathawktu tihhmasawnna tur hian kawng hrang hrangah an thiamna leh theihna tipung turin zirtirna an mamawh ang pek a tul thu sawiin chumi tur chuan tunlai thiamna an hman tangkai ve theih nan ‘Digital Literacy’ tha an neih theih nana hmalak tel a pawimawh thu a tarlang a. Kuthnathawktute dinhmun chawikan nan Mizoram sawrkar flagship program, Hand Holding Scheme tha tak a kalpui a pawimawh thu a sawi.

Dr. C.Vanlalramsanga, Economic Adviser, Ministry of Commerce pawhin thu sawiin India ram chu khawvel huap ang pawh a hmasawnna hna kalpuina kawng ah hmun pawimawh tak a luah mek thu tarlangin Mizoram pawhin hemi rual a hmasawnna hmel thar a hmuh ve theih nan kuthnathawktute thar chhuah man man zawk a hralh chhuahna kawng ah Sawrkar laipui, state sawrkar leh district level-ah te tanrual a pawimawh thu a sawi.

’International Conclave cum Buyer Seller Meet hawnna hun ah hian Pu Abhisek Dev, IAS, Chairman, APEDA leh Pi Vinita Sudhanshu, General Manager, APEDA te chuan kalkhawmte lawmna thu an sawi a. Power Point Presentation hmangin ‘Spice Board’, ‘Organic Scenario with special focus on Mizoram’ leh ‘Marketing Ecosystem in Mizoram’ hnathawh dan leh hmachhawp tarlan a ni a. Pu Bidyut Baruah, DGM, APEDA chuan lawmthu sawina hun a hmang bawk a ni. He hun ah hian International Buyer, Indian Exporter, District tin atangin District Agriculture Marketing Committee, Farmers Producers Organisation leh Private enterprise  engemaw zat an tel a. An thil thar chhuah te stall ah phochhuakin Buyer/Exporter-te nen hian indawrtawnna hun an hmang nghal a ni.

Pu Lalhmingmuana, Managing Director, Mizoram Agricultural Marketing Board tarlan danin Mizoram district hrang hrangah Primary society 795 an awm mek a. Kum 2025 chhung hian sawhthing Qtl 14,87,000, Mizo hmarchate Qtl 44,700, hmunphiah Qtl 99,500 leh Aieng Qtls 78,800 thar chhuah beisei a nih thu a sawi.