3405/2024-2025
Aizawl, the 6th December, 2024: Directorate of Sainik Welfare & Resettlement hmalaknain Armed Forces Flag Day, 2024 pualin vawiin khan Mizoram puma sorkar office hrang hrangah vehbur khawn leh Lapel Pin zawrh a ni a, hemi atang hian sum engemawzat hmuh a ni a. Tlawmngaia thawhlawm lo petu leh Flag Day Material tlawmngaia lo leisaktu zawng zawngte chungah thinlung takin Directorate of Sainik Welfare & Resettlement chuan lawmthu a sawi a ni.
Armed Forces Flag Day hi kum 1949 atang khan India ram pumah kum tin December ni 7 ah hman thin a ni a. Hemi ni hian sipai huaisen, ram leh hnam tana nun hlantate hriatrengna leh la tanglai mek, mahni in lum leh chhungte bula awm lova, ram leh hnam venhimna atana vur ram khawvawt, thlaler ram ro, ram pilril, ngawdurpui, tuifianriat zau tak leh vansanga ram venhim hna thawktute zahna chibai bukna ni pahfawmin, ram leh hnam tana nun hlantate leh an chhungte mi harsa zual tanpui nan vehbur khawn thin a ni.
