410/2025-2026

Aizawl dated 30th April 2025: Vawiin chawhma khan Commerce & Industries Department Minister pisaah Commerce & Industries Department hnuai a Industry tihhmasawnna tur a ram zuahte, dan lo tak a luah mektute chungthu ngaihtuahin thutkhawm a ni a. Minister Pu F. Rodingliana’n thutkhawm hi kaihruaiin Land Revenue & Settlement Department Minister Pu B. Lalchhanzova’n a telpui a. Industrial Growth Centre (IGC), Luangmual leh Export Promotion Industrial Park (EPIP), Lengte ram huam chhunga dan lova ram luahtute leh luah tur a phalna neite pawhin ruahmanna awmsa anga an luah loh avangin thutkhawmna hi koh a nih thu Pu F.Rodingliana chuan a sawi a. Hemi chungchang a Commerce & Industries Department leh Land Revebue & Settlement Deaprtment thu lo rel tawh bawhzui dan thlirletna hun neih niin hmalak chhunzawm dan turte sawi ho a ni.

Industry Minister Pu F. Rodingliana chuan Industries ram, a bikin Industrial Growth Centre, Luangmual, Export Promotion Industrial Park, Lengte leh Industrial Estate, Zuangtui ram nek avangte, dan lova luah luitute avangte leh phalna leh ruahman ang (allotment pek) ni lova hmangtute chu insaseng turin Sawrkarin hun thahnem tak a pek chung pawh a thupek zawm duh lo an la awm thu a sawi a. Ram tihhmasawn nan leh thalaite eizawnna siamna hmun tur heng Industry ram te hi a nihna tur ang tak a hman tangkai a nih theih nan hma chak tak a lak chhunzawm tur a nih thu a sawi.

Revenue Minister Pu B. Lalchhanzova chuan Commerce & Industries ram buai chinfelna turin theihtawp a chhuahpui tur thu a sawi a. Hmalakna awmze nei leh sawt zawk a kalpui a nih theih nan Department pahnihte tanrualna a pawimawh thu a sawi a, thawktute inrawntawn reng turin a chah bawk a ni.

He thutkhawm ah hian dan lova Industry ram luahtute chu hriattirna (showcause notice) pek ni se tih te, thupek zawm lo te chu ‘The Mizoram (Land Revenue) Act 2013,’ Section 101-na behchhana pawisa chawi tir tura hrem theih a nih dan te sawi ho a ni a. Dan a inziak angin thil dik lo titute hi Rs. 10,000 thleng chawitir theih niin, thupek an zawm loh luih zel chuan nitin Rs. 5000 chawitir theih a nih thu te tarlan a ni.

Thutkhawm ah hian Commerce & Industries, Land Revenue & Settlement Department, Aizawl Deputy Commissioner Office-a thawktute leh dan lam thiam mite an tel a ni.