No.7271/2020-2021   

Commerce & Industries Centre, Hnahthial-ah Puantah zirna 'Handloom Training' chu vawiin khan Pu J.Hmingthanmawia, IAS, Director, Commerce & Industries Deptt chuan hawngin "Thiamna hi a hluin tuman min chhuhsak thei lova, eizawnna a keng tel bawk a ni" tiin puantah zir turte chu sorkar duhdan hriaa thiam tum tak takna nei turin a chah a ni.

Pu J.Hmingthanmawia  chuan Handloom chu sorkarin a ngaihpawimawh thu leh ZOHANDCO te pawh din thar leh a nih thu sawiin Commerce & Industries Deptartment hnuaia SEDP kalpui turah pawh Handloom chu kalpui hmasak ber a nih dawn thu a sawi a ni. Puantah chu eizawnna tlak a nih thu  sawiin Pu J.Hmingthanmawia chuan "Mizote hi kan pi leh pute atang tawh khan Puantah kan uar em em a, thiam pawh kan thiamin khawvel thang zelah awlsam leh changkang zawka tah dan pawh a rawn chhuak  zel a, tuna Mizo ten kan tah dan pawh hi a hlawkin a tha hle a ni" a ti a. Puantah zir turte chu eizawn nana hmang thei ngei tura tih tak takna nen zir tura chahin "tha taka zirte chu kan umzui dawn che u a ni" tiin trainee te chu thla khatah Rs.1000 Stipend pek an nih dawn thu leh zirchhuakte hnenah Khawl Rs.20000 hu man leh a dahna tur siam nan Rs.30000 an pek dawn thu C&I Director chuan a sawi bakah Hnahthial-a puantah zir tur phase-I atana lak te hi mi 20 niin thla 6 chhung an zir ang a, hemi hnu hian phase dang kalpui tum leh a nih thu a sawi bawk a ni.

He hunah hian Hnahthial District atanga Industrial Development Board member awmchhun Pu J.Lalchhuana chuan "Chief Minister Pu Zoramthanga leh bialtu MLA leh C&I Minister ni bawk Dr.R.Lalthangliana leh Department hotute ruahmanna anga kan District chhungah Puantah zirna hawn a ni hi kan lawm hle a, Hnahthial District tan vawiin hi Ni chhinchhiah tlak niin mi harsa zawk leh tanpui ngaite dinhmun siam nana kawng hawn sakna pawimawh tak pakhat a ni" a ti.

He hun hi Pu R.Laltanzuala, Gen.Manager, DIC Lunglei chuan kaihruaiin Pu Lalremruata, Member, Industrial Development Board chuan thu a sawi bakah Pu F.Laldinthara, Vice President, Hnahthial Town VC Association chuan lawmthu sawina hun a hmang bawk a ni

Hnahthial-a Puantah zirna hawn zawh hian Pu J.Hmingthanmawia, Director, C&I Deptt chuan Tarpho khuaah Puantah zirna hi vawiin tlai khan a hawng leh bawk a ni.