1576/2023-2024

Champhai the 19th August, 2023 –  Land Customs Station, Zokhawthar tih changtlun na tura project 'Infrastructure Development for Border Trade Facilitation at Zokhawthar' hnuaia hna hrang hrang kal mek zinga pakhat Officers' Quarters chu Commerce & Industries Department changtu Dr R. Lalthangliana chuan vawiin khan a hawng a ni. He hunah hian Champhai South bialtu leh EF&CC etc te changtu Minister Pu TJ Lalnuntluanga chu khualzahawm a ni.

Hawnna inkhawm Pi Lalsangpuii, Additional Director, Commerce & Industries Department kaihhruaiah Commerce & Industries Minister Dr R. Lalthangliana chuan ram dang nena kan insumdawn tawnna tura hmalakna kal zelah Land Customs Station, Zokhawthar ah ruhrel tha tak buatsaih belh a ni chu lawmawm tiin, theihtawp chhuaha hma la tu Department officials te chungah lawmthu a sawi a. India rama Land Customs Station 20 te zingah Mizoram in pahnih lai - Zokhawthar leh Zorinpui kan chang thei hi kan economy tih hmasawnna tur atana thil lawmawm tak a ni tiin, Kawrpuichhuah lamah pawh hmalakna liantham taka kalpui mek anih thu a sawi a. Zokhawthar leh a chhehvel chu Mynamar nena kan insumdawn tawnna hmunpui ber ala ni chhunzawm zel dawn a, tun dinhmunah SASCI kaltlangin cheng nuai 1500 hmanga hnathawh mek a ni a, hei hian kawng hrang hrangin hmasawnna ala thlen zel dawn a ni tiin he sumdawnna hmunpui ti hlawhtling tur hian Zokhawthar leh a chhehvel mipuite hmalak puiah a sawm a. Covid-19 hrileng rapthlak tak, lirnghing nasa tak, vawk pul hri leng, ramri a buaina, Manipur leh Myanmar a buaina te karah  mipui himna leh damna turin Sawrkar chuan theihtawp chhuahin sum leh pai tam tham tak pawh a seng a. Heng harsatna khirhkhan tak tak hmachhawn chung hian sawrkar chuan hmasawnna hnathawh lamah pawh theihtawp chhuah zelin hnathawk lak belh kawngah te leh ruhrel ruahman belh kawngah te pawh hmasawnna nasa tak kan nei a ni, a ti a. Border trade ti hlawhtling turin a chhehvela cheng mipuite an pawimawh hle a ni tiin khawtlang hruaitute leh mipuite  thawhho puiah a sawm a ni.

He huna khualzahawm Champhai South bialtu MLA & Minister EF&CC etc Pu TJ Lalnuntluanga chuan Mizoramin industry lian kanla nei lova, state te leh la pachhe tak niin chhiah lak khawm tur a tam lova, hetiang hi kan dinhmun anih avangin kan state economy than len zelna turin ram dang nena insumdawn tawnna tih hmasawn a pawimawh takzet a ni, a ti a. Bangladesh leh Myanmar ram te nena kan insumdawn tawnna ti hmasawn turin Sawrkar chuan theihtawp a chhuah zel thu sawiin Minister chuan amah ngei pawh sawrkar hmalaknain Moreh Land Port, Manipur leh Tripura state-a Bangladesh border te tlawhin sumdawnna an kalpui dan te uluk takin an zirchian thu leh hemi chungchangah Sawrkar Laipui Ministry of External Affairs leh Ministry of Commerce te pawh an dawr thu a sawi a. Zokhawthar border trade chu kan economy innghahna hmunpui ala zel dawn a, chumi tur chuan sawrkar pawhin ruhrel bun belh kawngah te, inkalpawhna siam that kawngah te hma ala zel a, taxi leh autorickshaw te pawh service theiin ruahmanna siam fel a ni tawh a. Melbuk leh Zokhawthar inkar kawng siam that nan SASCI sum cheng nuai1350 ruahman fel tawh a ni, a ti bawk. Hmasawnna hi ni khat thil thu ah a thleng mai theilova, kan ram dinhmun mil tawk leh kan mamawh tawka hmalak zel a tul a ni tiin, Zokhawthar border trade ti hmasawn tura Commerce & Industries Minister Dr R. Lalthangliana leh Department thawktute hmalakna chu fakawm tiin, an chungah lawmthu a sawi a ni.

Champhai North MLA & Vice Chairman H&FW Board Dr ZR Thiamsanga pawhin thu sawiin tun hnaiah Champhaiin hmasawnna thar duhawm tak tak - General Nursing & Midwifery (GNM) School, Champhai, Critical Care Block, District Hospital, Champhai sak mek te leh Land Customs Station, Zokhawthar tih changtlunna ruhrel thar kan nei te hi hmasawnna duhawm tak a ni tiin sawrkar hotute leh Department official-te chungah lawmthu a sawi a. Land Customs Station, Zokhawthar ti changtlung tura hmasawnna hna lian tham tak kal mek chu anih tur ang ngeia hlawhtling taka puitlin anih theihnan Department thawktute taima taka thawk chhunzawm tura ngenin tlawmngai pawlte leh khawtlang hruaitute tawiawmna leh finchhuahna a dil sak a ni.

Pu Samson Rosangzuala, JE, Commerce & Industries Department chuan Technical Report a pe a. Infrastructure Development for Border Trade Facilitation at Zokhawthar Project hi Special Assistance to States under Capital Expenditure/Investment (SASCI) 2020-21 fund cheng nuai 1500 hmanga thawh mek a ni a. Lushai Engineers, Ramhlun Aizawl ten hna thawk mekin, April ni 20, 2022 ah an thawk tan a, thla 24 chhunga thawh zawh tur a ni. Officers’ Quarters hi cheng nuai 216 senga sak niin, 2BHK quarter paruk (6) sak a ni.

Vawiin program-ah hian Rev Peter Lalhmunmawia, Bialtu Pastor Zokhawthar PCI chuan hunserh a hmang a, Pu Ronald Lalchhuanawma, Deputy Director, Commerce & Industries Department chuan lawmthu sawina hun a hmang a ni.

Vawin program- ah hian Champhai District Bawrhsap Pu James Lalrinchhana, SP Pu Lalrinpuia Varte, Sawrkar official-te,  Zokhawthar VCP Pu Lalmuanpuia leh a thawhpuite, party hruaitute leh sawm bik dangte an tel a ni.