1472/2023-2024

Aizawl, the 12th August, 2023: Commerce & Industries Minister Dr. R.Lalthangliana chuan tukin dar 7:00 khan New Market, Aizawla Bazar building sak mek chu tlawhin hmalak tawh chin leh hmachhawpte a enfiah a, Line Department Official, Contractor leh Sumdawng hruaitute a kawm nghal bawk.

Commerce & Industries Minister Dr. R. Lalthangliana chuan hripui leng avanga harsatna leh inkhuahkhirhnate'n kum 2 lai hna a tih khaihlak phah thu leh hemi avanga tum ang huna bazar sak hna zawhfel hman a nih loh thu sawiin, Contractor-te chu hna tlo leh tha, ram leh hnam tana rotling sa zo thuai thei tura chak taka thawk turin a hrilh a. Bazar building sak hna thawktu Contractor leh MIMA hruaitute kawmin mamawh leh tul an thlente bawhzui dan turte a sawipui a. Heng bakah hian building sak mek avanga sumdawng leh mipuite'n harsatna an tawhte sawipuiin a hmunah a enfiah bawk a; chinfel dan turte a sawipui nghal bawk a ni.

New Market Aizawlah hian bazar building sak mek hlawm hnih a awm a; Commerce & Industries Department hnuaia cheng nuai 3641.59 senga sak mek, Aizawl City Centre Annexe (ACC Annexe) leh Aizawl Smart City Project, UD&PA hnuaia cheng nuai 4159.03 senga sak mek, Aizawl City Centre (ACC) te a awm a. Aizawl City Centre (ACC) hi Smart City Project hnuaia thawh a nih angin ruahman dan chuan June 2024 a zo hman tura beisei a ni a, Aizawl City Centre Annexe (ACC Annexe) hi January 2024 a zo hman tura beisei a ni.

Commerce & Industries Minister Dr. R.Lalthangliana hi AMC Deputy Mayor Pu R.Thanglura, Executive Councillor leh bialtu Councillor ni bawk Pi B.Lalawmpuii, Aizawl Smart City Limited CEO Pu C.C. Lalchhuangkima, Directorate of Commerce & Industries (Commerce) Addl. Director Pi Lalsangpuii, Official dangte bakah Mizoram Merchant Association (MIMA) hruaitute leh Contractor Lushai Engineers-te'n an tawiawm a ni.