1473/2023-2024

Nimin ni 11.8.2023 (Zirtawpni) khan NE Khawdungsei Branch MHIP-in a thlawna puanthui zirna an buatsaih chu Vice Chairman, HRD Board leh Lengteng bialtu MLA ni bawk Dr. L.Thangmawia’n a hawng a, MLA hi Pu H.Lalramliana MCS SDO(Civil) Ngopa leh BDO ten an tawiawm a ni.

Hawnna inkhawm NE Khawdungsei Branch MHIP President Pi Nuthani kaihhruaiah Dr. L. Thangmawia chuan NE Khawdungsei MHIP ten hun rei tak atanga an lo tum tawh, hmeichhia puanthui zir duh, Aizawl leh hmun danga zir ve thei si lote tana mahni khuaa zirna an lo buatsaih thei ta chu a lawmpui thu a sawi a, an thawhrimna leh an hmeichhiatpui mi harsa zawkte tana MHIP te an inpekna ropui a tih thu a sawi bawk. Mitin ten silh leh fen an mamawh theuh avangin mihring awm chhung chuan puanthui thiam hi mamawh reng a ni dawn a, eizawn nana hmang kher lote tan pawh mahni chhungkua tan a tangkai em em tho dawn a ni tiin, puanthui a thlawna zir tura an thlante chu eizawnna tlak leh an pasal fanaute tana tangkai taka an thiamna te hmantlak ni tura zir turin a fuih nghal bawk.

NE Khawdungsei MHIP branch hian hun rei tak atangin puanthui zirna buatsaih tumin puanthui khawlte an tuak chho bek bek a. Panga an neih tawhsa bakah MLA hian panga dang a pek belh nghal a ni.

MHIP te hian tum khatah an khawl neih zat, mi 10 zelte tan training an buatsaih dawn a. A hmasa ber atan mi 10 puanthui zir tur thlan fel a ni tawh a, ni 14.8.2023 hian an zir tan dawn a ni. Tun tuma mi 10 te training an pek zawh hnuah pawh a remchan dan angin a batch dang an kalpui leh zel dawn a ni.