No.5605/2020-2021

Vawiin chawhnu khan SAD Conference Hall-ah Commerce & Industries Minister Dr. R. Lalthangliana hovin Pradhan Mantri Formalisation of Micro Food Enterprises (PM FME) scheme hnuaia hmalak dan tur sawiho a ni a, Industrial Development Board Vice-Chairman Pu C. Ramhluna, MLA bakah Department hrang hrang - Commerce & Industries, Horticulture, Fisheries, Sericulture, AH & Vety, UD&PA leh MIFCO hotute an tel a ni.

Minister Dr. R. Lalthangliana chuan COVID-19 vanga India ramin harsatna kan tawh nasat zual lai tak June thla tawp khan sawrkar laipui chuan Pradhan Mantri Formalisation of Micro Food Enterprises (PM FME) scheme a rawn duang chhuak a, he scheme hi cheng vaibelchhe singkhat hu niin kum 5 chhung kalpui tur a ni a, Mizoram hian Food processing-ah potential kan nei tha em em mai a, kuthnathawktute leh thalai mahni kutke a din tum ten an chhawr thiam chuan a tangkai hle dawn a ni a ti a. Hei bakah hian COVID-19 vanga eizawnna kawnga harsatna tawk kuthnathawktute leh entrepreneurs te chhawmdawlna tur ruahmanna hrang hrang sawrkar laipuiin a kalpui mek bawk a, COVID-19 vangin phaia lama hnathawk thalai tam tak Mizoramah an rawn haw a, COVID-19 boruak zia awm hnu ah an let leh vekin a rinawm loh bakah hnathawh tur hmuh a harsa thei bawk a, hengte vang hian kan thalaite tan eizawnna tha leh changtlung siamna tur atan kawng kan kawhhmuh a pawimawh tak zet a, sawrkar laipuiin scheme thar engemawzat a rawn duang a, Commerce & Industries department hi nodal department ni mah ila, hma la tak tak tur chuan department hrang hrangte nen thawhho a tul a, kan thalaite hmakhaw ngai tak chunga ruahmannate pawh kan siam tlan a pawimawh dawn a ni, a ti a. COVID-19 vanga harsatna lo thleng hi malsawmna ah kan chan tir thei a ni, a ti.

Vawiin thutkhawmna a tel department hrang hrang aiawhte chuan thlai rah, thei rah leh sa thianghlim leh awmze nei zawka sawngbawl bakah hlawk zawka hralh theih tura sawngbawl dan tur Mizorama kan kalpui theih tawk tur ni a an hriatte an sawiho a, Mizoram chhung ngeia ran chaw thar chhuah tam lehzual a pawimawh dan te, Changpat hmanga leitha siam (Vermicompost) project UD&PA in an hlawhtlinpui tan mek thu tarlan niin, Dragon Fruit leh sum chang thei leh thlai chi hrang hrang hmanga thalaite tana eizawnna tha siam sak dan tur leh a hralhchhuahna (market) chungchangte sawiho a ni bawk a. Department hrang hrangin an project neihte tarlangin sector hrang hrangah thalai te chhawr tangkai tur ruahmanna siam chungchang an sawiho bawk a ni.