No.5605/2020-2021

Aizawl, the 30th September 2020 : Naktuk hi Upate Ni a ni a, hemi ni pual hian vawiin khan Social Welfare Department chuan an mahni chawimawina hun tawite Social Welfare Minister Dr. K. Beichhua Pisa ah an buatsaih a. He programme ah hian Minister chuan Mizorama kum 100 tling upa mi 19 te hnenah chawimawina a hlan a. Mizoram Upa Pawl General Headquarters Aizawl leh Mizo Upa Pawl Lunglei hruaitu te hnenah kum za tling te aiawhin chawimawina leh sumfai cheng 1000 theuh chu hlan a ni.

Minister Dr. K. Beichhua chuan Mizoram pumah kum za tling MUP an zawnchhuah mi 19 lai an awm chu lawmawm leh ropui a tiin hetianga chawimawina hun an mahni ngei sawmin buatsaih a chakawm rualin kan hun tawn mek in a zir loh avangin mi tlem te hovin he programme hi hman niin MUP kutah chawimawina te hlan a ni a ti. Sawrkar leh Department in a theih ang angin upa te hi a ngaipawimawh a, hnam ang pawhin thangthar ten upa te hlutna hriain ngaihsakna chang an hre chho zel te hi thil lawmawm tak a ni, a ti bawk.

Minister chuan upa te hlutna sawi tur tam tak awm zingah an tawnhriat atanga thangthar ten zir tur tam tak kan neih chu a pawimawh pawl nia a hriat thu a sawi a. Department chuan phak tawk angin upate harsatna tawh sutkian leh an mahni enkawlna chu engtik lai pawhin a ngaipawimawh a, Aizawl leh Lunglei ah te Upate awmna tur Old Age Home sak tan nan concept note te siamin hma lak mek anih thu a sawi. Sawrkar finchhuahna a tulna kawngah te, thu rawn pek a tulnaah te MUP member leh upate chu inthlahrung lova, chungte chu sawi leh rawt zel turin a ngen nghal bawk a ni.

He hun tawite hi Pu HL. Rochungnunga, Commissioner & Secretary, Social Welfare Department in kaihruaiin Mizoram Upa Pawl hriatute atangin Upate Ni chungchang sawi a ni a, Sawrkarin upate a ngaihsaknaah lawmthu an sawi bawk a. Dr. Ankita Chakrabarty, Director Social Welfare and Tribal Affairs Department in lawmthu sawiin hun a khar a. He hunah hian MUP General Headquarters hruaitute an tel bawk a ni.

Kum 100 tlingte vawiina chawimawi hlan te chu -
1. Lalmawii, Bethlehem Veng
2. Nuchhungi, Disha
3. Zadengi, Tlungvel Venghlun
4. Sawiluaia, Bethlehem Veng
5. Lalrokhuma, Mamit Chhim Veng
6. Khuangbeli, Mamit Chhim Veng
7. Thanthuami, Zemabawk
8. Vanhnuaichhungi, Zemabawk
9. Ralsawiluaii, Zemabawk
10. Hrangkili, Ramhlun North
11. Lalneihthangi, Khatla
12. Aiziki, Chanmari Lunglei
13. Kapchhawna, Mualcheng S
14. Ngunchuaii Tawipui N
15. Bualiangi, S Vanlaiphai
16. Lalthanmawii, Zotlang, Lunglei
17. ZD Lalzami, Serkawn, Lunglei
18. C. Chawngbuangi, Theiriat, Lunglei
19. HS Durkhuanga, Sairep

An zinga upa ber chu Pi Aiziki leh Pu Kapchhawna niin kum 105 ve ve an ni.