No.5604/2020-2021

Vawiin chhun dar 12:00 khan Sports Authority of India (SAI) leh All India Football Federation (AIFF) te tangkawp chuan online hmanga Football zirna kalpui dan tur chungchang Webinar hmangin sawihona (Workshop) neih a ni a. He hunah hian Governor P.S. Sreedharan Pillai chu Khuallian niin, Sports Minister Pu Robert Romawia Royte chu Khualzahawm a ni.

He Workshop-ah hian Sports Authority of India-in Standard Operating Procedure (SOP) a tihchhuah zulzuia Covid-19 hripui avanga ram pum huapa duh anga chaka infiamna lam kalpui theih a nih loh avangin online hmanga naupangte leh tleirawlten mumal zawka training an neih theih dan tur sawi ho a ni.

Khuallian Governor P.S. Sreedharan Pillai chuan SAI, AIFF leh Mizoram State Sports Council(MSSC) te tangrualin infiammite tana programme pawimawh tak Online kaltlanga sawihona hun an buatsaih chu lawmawm a tih thu a sawi a. E-Pathshala Web Platform kaltlang hian Social Distancing bawhchhe si lovin football khel thin ten an inthiamthil te an inzirtir thei dawn a; football khelh inzirtirna tangkai tak a ni dawn a ni a ti. “ Vawiina Webinar hi state zinga football atchilh pahnih Kerala leh Mizoram te football huanga an thawhhona remchang tak a ni a. Heng state pahnihah hian Football chu eizawnna tling a ni tawh a. Mizoram atang phei chuan football khelthiam state pawn lamah eizawngin tam tak an khel mek a. Mizoram tan phei chuan Football hi mi ten min hriat larna leh kan “Brand Name” a ni hial tawh a ni”, a ti. Mizoramin football a hlawhtlin puina kawngah Sports Minister chaktak leh Mizoram Football Association (MFA) hmalakna zawng zawngte a chhuanawm tak zet a. Vawiina sawiho E-PathShala- online football coaching & education pawh hian football thiamna zirtirna kawngah Mizoram tan hlawhtlina a thlen chhoh ngei a beisei awm a ni a ti.

Sports Minister Pu Robert Romawia Royte pawhin Sports Authority leh All India Football Federation ten hripui leng kara infiammite hmakhua ngaihtuaha hetiang Workshop an buatsaih chu lawmawm a tih thusawiin, Mizorama infiam mite hmasawnna tura Central sorkar leh Mizoram sorkarin infrastructure development lama chak taka hma a lak mek thu sawi langin, tuna workshop-a ngaihdan tha tak tak kan sawihote hi infiammite pawhin an sawtpui ngei a beisei thu a sawi bawk.

He Workshop-ah hian Pu Rathin Saha, Manager, Grassroots (AIFF) Paper buatsaih chu zirho a ni a. Mizoram atangin Pu John Tanpuia, Secretary, Mizoram State Sports Council leh Pu Lalnghinglova Hmar, Secretary, Mizoram Football Association ten thu sawiin, India ram hmun hrang hrang atangin infiam mite aiawhin mi za sawmnga chuangin he Workshop hi an chhim a ni.

Attachment

  • Loading attachment...