1403/2024-2025

Aizawl dated 1st August, 2024: Vawiin chawhma khan Exhibition Hall, Millenium Centre Rooftop-ah 10th National Handloom Day lawmna puala Ministry of Textiles, Govt. of India leh Commerce & Industries Department-te tangkawp buatsaih ‘Hathkargha Mela/State Handloom Exhibition’, August ni 1 atanga ni 14 thleng awh tur chu Commerce & Industries Minister Pu F.Rodingliana’n a hawng.

Minister Pu F.Rodingliana chuan Handloom kaltlangin Mizoram hmun hrang hrangah mi engemaw zatin eizawnna ngelnghet an neih phah thu sawiin, Handloom chu kan hnam ziarang phochhuah leh humhimna kawnga hmanraw tangkai tak a nih mek thu a sawi a. Handloom-in hma a sawn zel theih nan kan kutchhuakte chawisan leh ngaihhlut nachang hriat chu mi tin mawhphurhna a nih thu sawiin, hnam ziarang nasa zawka phochhuah a nih theih nan Commerce & Industries Department-a thawktute chuan Handloom lam a tui mite an kaihhruai fo a pawimawh thu a sawi a. Commerce & Industries Minister chuan Sawrkarin kuthnathawk, hlawhtlin tuma beitute tha tichak tura tanpuina pek a ngaih pawimawh thu tarlangin, Handloom lama tui mi, ’Hand holding Policy’ hnuaia tanpui tlakte dapchhuah leh tanpui dan tur ruahmanna siam turin thawktute a chah a. Mizo kutchhuah Handloom hrang hrang tih hmasawn nan ‘State Handloom Exhibition’ chu hlawhtling taka kalpui turin duhsakna a hlan a ni.

Pi Maria CT Zuali, Director, Commerce & Industries Department chuan kalkhawmte lawmna thu sawiin, hnam ziarang pholang theih thuam hrang hrang siam chhuah leh chawilar kawngah mizo hmeichhiate fakawm a tih thu a sawi a; handloom chu eizawnna tlak tak a nih angin hemi kawnga tui mite chu tan la zel turin a fuih bawk a ni.

State Handloom Exhibition hawnna hun hi Pi Hunthianghlimi, Dy. Director (Handloom, Textiles & Handicrafts) chuan a kaihhruai a, Heritage handloom te’n an kutchhuak thuam chi hrang hrangte phochhuakin entirna hun an hmang a.  State Handloom Exhibition-ah hian Stall 60 an in phochhuak a, August ni 14, 2024 thleng a awh dawn a ni.