1404/2024-2025

Dated Hnahthial, the 1st August, 2024: Vawiin khan Hnahthial Bawrhsap Pi Rita Lalnunmawii Pachuau kaihhruaiin a Pisa-ah 'Maternal & Child Death Review' meeting neih a ni. He hunah hian Chief Medical Officer (CMO), Dr. R. Lalsanglura chuan Hnahthial District Mortality Review 2023-2024 chu pharhin zirchianna leh sawi hona hun neih a ni.

Hnahthial Bawrhsap Pi Rita Lalnunmawii Pachuau chuan kum 2023-2024 chhungin Hnahthial District-ah nu nau chunga thi (Maternal Mortality Rate) leh naupang kum nga hnuai lam thi (Under-5 Mortality Rate) an awm lo chu lawmawm a tih thu sawiin, hetiang dinhmun lawmawm tak nei thei tura thawktute thahnemngaihna leh inpekna chu fakawm a tih thu a sawi a; theihtawp chhuah chhunzawm zel turin a fuih bawk a ni. 

Pi Rita Lalnunmawii Pachuau chuan naupai hun chhung, nau neih leh a hnu zela inenkawl kawngah hetiang lama thiamna neite chauh rawn thin turin mipuite a chah a. Mipui hriselna enkawl tura ruat thiamna nei leh rawntlak Doctor-te chauh pan thin tura mipui hnena zirtirna pe tam turin khawtlang hruaitute a chah bawk a ni.  

Meeting-ah hian Dr. Zosangliani, Paediatrician, District Hospital Hnahthial; Pi K. Lalengmawii, District Programme Manager, NHM leh tlawmngai pawl hruaitute an tel a ni.