No.7388/2020-2021 

Commerce & Industries Minister Dr. R. Lalthangliana chuan vawiin khan Indo-Myanmar Border Trade Centre atana ruahman mek Bungkhawkai a tlawh.

Minister-in Bungkhawkaia Border Trade Centre a tlawh hian a hmunah Myanmar lama Bung khua leh a chhehvel hotuten lo hmuakin inkawmna hun tha tak an hmang a ni.

Bungkhawkaia inkawmhona hunah hian Commerce & Industries Minister Dr. R. Lalthangliana chuan Thingsai atanga Bungkhawkai inkar kawng Tiau lui thlengin kawng an laih tlang tawh hian Mizoram sawrkar leh India sawrkarin Myanmar nena insumdawn tawnna an ngaih pawimawhzia a tilang chiang hle a ni, a ti a. Tunah hian kawlphetha lakluh dan tur ruahmanna siam mek a ni, a ti bawk.

Minister chuan Tiau rala chengte hi kan u leh nau tak tak in nih avangin kan inthlahthlam tak tak thei lova, kan inunauna kan tih chak thar zel a pawimawh em em a ni, a ti a. Insumdawn tawnna atana hmunhma rem leh tha tur Commerce & Industries department in a melh chhunzawm zel a ni, a ti a. India sawrkar pawhin ASEAN ramte nena insumdawn tawn a ngaih pawimawh avangin Bungkhawkai Border Trade Centre a taka kalpui a nih hunah chuan a pawimawh telh telh dawn a ni, a ti a. Insumdawn tawnna tichak turin Mizoram sawrkarin a tih tur awm ang chu a bawhzui zel dawn a, sumdawnna mai bakah thuk lehzuala kan inunauna kan thlun ngheh a pawimawh hle a ni, a ti.

Kum 2002 vel atang tawh khan Mizoram Sawrkar chuan Thingsai-ah Border Trade Centre din a nih theih nan Central Sawrkar-ah ngenna a siam tawh a. Ram pahnih (India leh Myanmar) insumdawn tawnna tur a nih avangin heng ram pahnih sawrkar te hian Trade Agreement an siam a ngai a, tunah hian Trade Centre din a nih theih nan thar thawh mek a ni. Mizoram Sawrkar chuan Trade Centre kan neihna tur hian theihtawp chhuahin hma a la mek zel a. Bungkhawkai hi Trade Centre tur hmun atan ruahman tawh a ni. A ram hauh nan leh sumdawng leh vei vakte mamawh chawlhbuk Bungkhawkaiah hian sak a ni tawh a, Market Shed pawh sak tawh a ni.

Thingsai atanga Border Trade Centre thleng tur Electrification mamawh Rs. nuaih 135.93 estimate siam zawh tawh a ni a, hei hi Central sawrkar-ah dil tur a hmalak mek a ni. Tiau luia Bungkhawkai Lei dawh that tum a ni a.

Superintendent Engineer (SE), Public Works Department (PWD) Lunglei ah Detailed Project Report (DPR) siam tur a ngen leh hriattir a ni tawh bawk a ni.

Vawiin inkawmhonaah hian Bung khua leh a chhehvel khaw 13 Village Council khaikhawmtu ber Bung khaw VCP Pu Tumhmunga chuan heng khaw 13 ah hian in 1310 leh mihring 8000 chuang an awm thu a sawi a, Bungkhawkai chu Indo-Myanmar border a inkalpawhna remchang leh hnaivai ber a ni tih sawiin Mizoram sawrkarin a ngai pawimawh a, Commerce & Industries Ministerin amah ngei kala a hmuna a rawn en chu lawmthu a sawi a, hei hian kan inunauna leh insumdawn tawnna ah phurna thar leh rah tha a chhuah ngei a beisei thu a sawi a ni.

Minister hi Minister hi Industrial Development Board Vice-Chairman Pu C. Ramhluna bakah Hnahthial district bawrhsap Pu Vanlalmawia, Hnahthial district Superintendent of Police Pu Lalbiakkila, Commerce & Industries, Health & Family Welfare leh I&PR officer ten an tawiawm a ni.