No.7387/2020-2021

Vawiin 11:00AM khan Dr. Vanlaltanpuia, MLA, Chairman, MYC leh Vice Chairman,Higher &Technical Education Board ni bawk chuan DRDA Conference Hall, Siaha-ah MYC Coaching Centre a hawng.

MYC Coaching Centre hawnna Programme hi Pu H. Lalnunzuia MPESS, Under Secretary, Mizoram Youth Commission chuan kaihhruaiin, Pu Kesavan R, IAS, DC Siaha chuan Welcome Speech a sawi. Pu Kesavan chuan Siaha-a MYC in coaching Centre an hawn chu lawmawm a ti thu sawiin, hetianga Coaching centre Sawrkarin a run hi Tamil Nadu state-ah pawh 90's vel atang khan an lo kalpui tawh a, thingtlang khua leh chhungkaw harsa zawk atanga Civil service exam tumtute tan a tangkai em em a ni. Kei pawh hetiang Coaching Centre zarzotu pakhat ka ni ve a ni tiin, MYC coaching centre-ah hian a tul chuan kei pawhin Faculty member angin puih ka inhuam reng a ni, a ti bawk.

Pu N. Lalzarzova,SDC chuan MYC Coaching Centre nei theih tura hmalak dan report pe in, nikum November-ah MYC hruaitu leh bialtu MLA, kan Minister zahawm tak Dr. K Beichhua leh a PS te, Palak Bialtu Pu KT. Rokhaw, MLA te leh MSO(H) hruaitute hovin ruahmanna siamin a hmun tur te an en ho hnuah Bazar KNP Building floor 2 chu thlatin luahman Rs.10,000/-chawi turin Coaching Centre atan hian an thlang ta a ni.Building hi classroom tur atan hman tur chuan renovation tih ngai a ni bakah, Furniture te, Internet Connection, White Board ,Projector, Computer set, printer leh hmanrua mamawh hrang hrang te chu Minister Dr.K.Beichhua chuan a MLA Fund atangin a tum vek dawn a ni. Coaching centre lo vila, hna tul ang ang lo thawk turin MSO(H) an in volunteer bawk a ni.Faculty lam hi MYC chuan an lo buaipui thung dawn a ni.

Khuallian Dr.Vanlaltanpuia MLA, Chairman MYC, chuan thu sawiin, Vawiina MYC coaching hawng theih tura hmalaknaah Minister Dr.K.Beichhua leh MSO(H) te bakah District Administration chungah lawmthu ka sawi tak zet a. Competetive Exam-ah chuan Siaha District hi Mizoramah in duai lo hle a, Coaching Centre hi in phu ve reng bawk a ni.He Coaching Centre kan hawn atang phei chuan Siaha District atang hian IAS leh Central Service dang bakah, NEET leh SMATEE ah te pawh hlawhtlinna nasa taka in chan ngei ka beisei tlat a ni. UPSC Coaching pawh kan ti duh lo, IAS coaching hial kan ti mai thin, a chhan chu kum 2014 atang khan Mizoram atangin IAS tumah kan inziak tling tawh lo, MYC hian IAS Mizoram atanga tlin tir leh hi kan thiltum lian tak pakhat a ni mek a ni. Siaha MYC coaching centre a faculty member tur te hi Alternative Learning System(ALS) coaching ,New Delhi te an ni ang tiin, MYC coaching centre ah hian UPSC exam chauh ni lovin, NEET,SMATEE te bakah hna ruak exam tur awm ang zir te pawhin zirtirna hi pek tur a ni, a ti. Vawiinah hian MYC in Mizoram atangin Zirlai thiamzual 20 New Delhi-a IAS coaching kal turin Lengpui Airport-ah kan vai liam dawn a ni, a ti bawk.

Pu Tp-a chuan sawi zawmin, Mizoram thalai lekha thiam, IAS ni thei mai tur pawh, State service-ah kan lungawi mai thin hi kan mutan pakhat a ni, kan tum te pawh kan tihsan a hun tawh takzet a ni, a ti bawk.

Pu Tp-a chuan MYC hian kan thalai lehkhatiam chin coaching chauh hi kan buaipui a ni lova, a lehkha thiam lo ten ei an zawnna tur Skills Development lam pawh kan buaipui nasa hle bawk a ni, a ti.

Vawiin Programme-ah hian khuallian Aizawl atang leh Lawngtlai atanga lo tawiawmtu te bakah, Head of office te, MADC official te, MJA member te,NGOs hruaitute,Political party hruaitute leh sawmbik te an telkim hle a ni.


Attachment

  • Loading attachment...