Commerce & Industries Minister Pu H. Rohluna chuan Mizo thalaite chawichhuahna hna hi thapui thawha beih a ngai a, chumi atana thil pawimawh ber pakhat chu entrepreneurship development hi a ni a, hemi kawngah hian sorkarin hma a la zel dawn a ni, a ti.

Entrepreneurship Knowledge Centre hawnna a thu sawiin Minister Pu Rohluna chuan mipui nawlpuiin leirem an rah theih nan NLUP sem a ni tawh a, chumi piah lama hmalak lehna atan sorkarin NEDP a duang chhuak tak hnuaia a peng pawimawh tak pakhat chu mahni kutkawih eizawnna tihhmasawn hi a ni, a ti. Hemi scheme hnuaiah hian thalaite hian training chi hrang hrang an mamawh a, eizawnna muala an rawn tlanluh dawn hian hriattur leh tihtur a tam hle a; chutianga thalaite’n an mamawh an hriatna tur hmun bik (centre) a lo awm thei ta hi a lawmawm hle a ni, a ti. Skill development leh entrepreneurship hi kalkawp tlat tur a ni a, miin thiamna (skills) nei ringawt mahse entrepreneur rilru a put loh chuan eizawnna a tling thei lova, thiamna ruahman bik mumal tak nei chunga entrepreneurship rilru zirtir an nih chuan reiloteah Mizo thalaite hi an dingchhuak zung zung thei ang, a ti bawk.

Minister hian ‘Entrepreneurship Knowledge Centre’ a hawn zawh hnuah ‘ESDP on Construction Supervisor Course’ chu a hawng nghal a. He training-ah hian Aizawl leh Mizoram hmun hrang hrang atangin lehkhathiam rual mi 20 chuangin thla khat chhung training an nei ang. Training-ah hian Insak leh kawng laih chungchanga hnathawktute enkawltu (supervisor) in a hriat tur tul ang angte zirtir an ni ang; heng thalai rualte hi Civil engineer te, Architect te, Surveyor leh Disaster Management lama expert ten practical nen an zirtir dawn a ni.

‘Entrepreneurship Knowledge Centre’ hi NEDP-EDS hnuaia Mizoram State Entrepreneurship Development Monitoring Committee (MEDMOC), Planning Department chuan ZIDCO Building, New Secretariat Complex-ah a din a. He Centre-ah hian training hall te, entrepreneur-te tana tangkai tur lehkhabu te, internet hmanga hmundang dawr theihna turte dah a ni. Loan leh sum dilna tura DPR mamawh siamna tur thlenga tanpuina hmun tur a ni a. Entrepreneurship tihhmasawnna tura thil tul ang ang chhawpchhuah zel tura duan a ni.

He Centre hawnna inkhawm hi Pu Benjamin IDAS, Commissioner & Secy, Higher & Technical Education Department-in a kaihruai a. Pu Joseph L. Ralte, Expert Member-in he Centre chungchang leh training chungchang a sawifiah a. Pu Lianchuangchunga, Gen. Manager, ZIDCO chuan lawmthu sawiin hun a khar a ni.